युनिकोड
ज्योति पाण्डेको विष्फोटक ब्याटिङको मद्दतमा एपीएफ महिला क्लब ललितपुर मेयर महिला च्याम्पिनयसिपको फाइनलमा प्रवेश गरेको छ।
शुक्रबार भएको पहिलो खेलमा एपीएफले ललितपुर मेयर्स एघार महिला टोलीलाई ७ विकेटले पराजित गर्दै एपीएफ एक खेल अगावै फाइनलमा पुगेको हो।
एपीएफले ३ खेलबाट ६ अंक जोडेर अंक तालिकाको शीर्ष स्थानमा छ। ललितपुर भने तिनै खेलमा हार भोग्दै तालिकाको पुछारमा छ।
ललितपुरले दिएको ८१ रनको लक्ष्य एपीएफले १३ ओभरमा ३ विकेट गुमाएर भेट्टायो। एपीएफकी ओपनर ज्योति पाण्डेले ५६ रनको विष्फोट पारी खेलिन्।
४५ बलको सामना गरेकी पाण्डेले ११ चौका हानिन्। रोमा थापा ११ रनमा नटआउट रहिन्। कप्तान सीता राना मगर १ र ममता चौधरी ५ रनमा रनआउट भए। सरिता मगर ८ रन बनाउँदा क्याच आउट भइन्।
ललितपुरकी अनुराधा चौधरीले एक विकेट झारिन्।
त्यसअघि किर्तिपुरस्थित त्रिवि क्रिकेट मैदानमा टस जितेर पहिले ब्याटिङ गरेको ललितपुरले निर्धारित २० ओभरमा ५ विकेट गुमाएर ८० रनको योगफल तयार पारेको थियो।
ललितपुरका लागि सुमन खतिवडाले ३० र आरती विडारीले २१ रन जोड्न बाहेक अन्यले दोहोरो अंकको स्कोर छुन सकेनन्। ललितपुरका ३ खेलाडी रन आउट भए।
एपीएफका करुणा भण्डारी र सुमन विष्टले समान एक विकेट झारे।
एपीएफले आफ्नो अन्तिम खेलमा आईतबार लुम्बिनी प्रदेशसँग खेल्नेछ। ललितपुरले पनि आईतबार नै प्रदेश १ सँग खेल्ने तालिका छ।
आजै हुने दोस्रो खेलमा सुदुरपश्चिम प्रदेश र प्रदेश १ खेल्नेछन्।
५ टोली सहभागी प्रतियोगिताको शीर्ष २ टोलीले उपाधिका लागि सोमबार खेल्नेछन्।
प्रतिक्रिया