नापी सर्भेक्षक मोहन यादव उपर आरोपपत्र दायर

अख्तियार दुरुपयोग अनुसन्धान आयोगले महोत्तरी जिल्ला अदालत, जलेश्वरमा कार्यरत नापी सर्वेक्षक मोहन यादवविरुद्ध विशेष अदालतमा भ्रष्टाचार मुद्दा दायर गरेको छ।

यादवले महोत्तरी जिल्ला अदालतमा दर्ता भएको मुद्दाको सम्बन्धमा स्थलगत नापजाँच गरी घर नक्शा अनुसार नभएको भनि विभिन्न बहाना बनाइ उक्त मुद्दा मिलाई दिन्छु भनि सेवाग्राहीसँग एक लाख ५० हजार रुपैयाँ घुस लिएको अख्तियारले जनाएको छ।

विशेष सूचना एवं उजुरीको आधारमा आयोगको कार्यालय बर्दिबासबाट खटिई गएको टोलीले सर्वेक्षक यादवलाई सेवाग्राहीबाट घुस÷रिसवत वापतको रकम लिइसकेको अवस्थामा रंगेहात नियन्त्रणमा लिएको थियो।

यादवको उक्त कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएको देखिँदा निजलाई विगो एक लाख ५० हजार) कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (घ) बमोजिम सजाय हुन मागदावी लिई आरोप–पत्र दायर गरिएको अख्तियारले जनाएको छ।