पहिरोले पृथ्वी राजमार्ग अवरुद्ध

तनहुँमा पहिरो जाँदा पृथ्वी राजमार्ग अवरुद्ध भएको छ।

पृथ्वीराजमार्गमा पर्ने तनहुँको म्याग्दे गाउँपालिका ४ थर्पुमा सडकमा पहिरो खस्दा बुधबार बिहानदेखि यातायात चल्न सकेका छैनन्।

अविरल वर्षापछि सडकमा पहिरोसहितको लेदो माटो खसेको प्रहरी चौकी थर्पुका सई कृष्णबहादुर बानियाँले जानकारी दिए। पहिरोमा एउटा ट्रक पनि फसेको छ।

सडकको पहिरो हटाएर यातायात सञ्चालन गर्ने प्रयास भइरहेको प्रहरीले जनाएको छ। पहिरोको कारण सडकको दुबैतर्फ सवारी साधनको लाम लागेको छ।