युनिकोड
गएको २४ घण्टामा भारतमा दुई लाखभन्दा कम संख्यामा कोरोना संक्रमित थपिएको त्यहाँको स्वास्थ्य मन्त्रालयले जनाएको छ।
१ लाख ९६ हजार ४२७ नयाँ कोरोना संक्रमित थपिँदा सोही अवधिमा ३ हजार ५११ को ज्यान गएको छ।
कोरोना संक्रमित हुनेको संख्या अप्रिल १४ यताकै कम भएको भारतको स्वास्थ्य मन्त्रालयले जनाएको छ।
मृतक दर र संक्रमित दर दुवैमा कमी आएको हो। यस्तै गएको २४ घण्टामा भारतमा ३ लाख २६ हजार ८५० कोरोनामुक्त भएका छन्। यहाँ संक्रमित हुनेभन्दा कोरोनामुक्त हुने दर पनि बढी छ।
तथ्यांकअनुसार यसै मे महिनाको ८ तारिखसम्म भारतमा दैनिक ४ लाखको दरले कोरोना संक्रमित थपिरहेका थिए।
त्यस मितिबाट ह्वात्तै संक्रमितहरु घटिरहेका छन्। गएको दुई हप्ताको अवधिलाई मध्यनजर गर्दा भारतमा कोरोना संक्रमणमा ५० प्रतिशतले गिरावट आएको छ।
भारतमा कुल संक्रमितको संख्या २ करोड ६९ लाख ४८ हजार पुगेको छ भने कोरोनाबाट ३ लाख ७ हजारले ज्यान गुमाइसकेका छन्।
अहिलेसम्म २ करोड ४० लाख ५४ हजार कोरोना मुक्त भएका छन् भने त्यहाँ २५ लाख ८५ हजार सक्रिय संक्रमित छन्।
प्रतिक्रिया