गुल्मीको इस्मा गाउँपालिकाका एक व्यक्तिले आफुनै बुबालाई कुटपिट गरेर हत्या गरेका छन्।
इस्मा गाउँपालिका ४ दोहोलीका अनिल बस्नेतले आफ्नै ६० वर्षीय बुवा दिलबहादुर बस्नेतलाई कुटपिट गरेर हत्या गरेका हुन्।
आइतबार साँझ ६ बजेतिर आफ्नै घरभित्र बुबालाई छोराले कुटपिट गरेका जिल्ला प्रहरी कार्यालयका सूचना अधिकारी जनकराज पन्थले जानकारी दिए। घाइते बस्नेतलाई उपचारका लागि आइतबार साँझ सुरुमा तम्घास अस्पताल लगिएको थियो।
मुख र छातीमा गम्भीर चोट लागेका दिलबहादुरलाई तम्घास अस्पतालले मिसन अस्पताल पाल्पा रिफर गरेको थियो। अवस्था गम्भीर रहेको भन्दै मिसन अस्पतालले प्रवास अस्पताल र प्रवास अस्पतालले प्रादेशिक अस्पताल बुटवल रिफर गरेका थिए।
अस्पताल डुलाउँदा डुलाउँदै सोमबार बिहान ४ बजे बस्नेतको मृत्यु भएको प्रहरीले जनाएको छ। अभियुक्त अनिल फरार छन्। रासस
प्रतिक्रिया