युनिकोड
गण्डकी प्रदेशमा बिहीबार मात्रै १०२ जनामा कोरोना संक्रमण पुष्टि भएको छ।
बिहीबार क्षयरोग उपचार केन्द्र, पोखरा स्वास्थ्य विज्ञान प्रतिष्ठान, पोखरा र चितवन मेडिकल कलेज, चितवनमा गरिएको परीक्षणमा बिहीबारमात्रै १०२ जनामा कोरोना संक्रमण भेटिएको प्रदेश स्वास्थ्य निर्देशनालयले जनाएको छ।
निर्देशनालयले बिहीबार बिहान र दिउँसो गरेर तीन पटक दिएको जानकारी अनुसार २३, ५ र ७४ गरी १०२ जनामा कोरोना पुष्टि भएको हो।
आज थपिएका संक्रमितमा कास्कीका मात्रै ७४ जना रहेका छन्। त्यस्तै लमजुङमा ५, नवलपरासी (सुस्तापूर्व)मा १२, तनहुँमा ५, बागलुङमा ४, गोरखामा २ जनामा कोरोना पुष्टि भएको प्रदेश स्वास्थ्य निर्देशनालयका निर्देशक डा. विनोदविन्दु शर्माले जानकारी दिए।
संक्रमितमध्ये कास्कीका ५ र बागलुङका ३ जना भारतबाट आइ क्वारेन्टिनमा बसेका ब्यक्ति भएको र अन्य कन्ट्याक्ट ट्रेसिङबाट पत्ता लागेको निर्देशक शर्माले जानकारी दिए।
उनले संक्रमित सबैलाई आइसोलेसनमा लागिसकिएको जानकारी दिए।
योसँगै गण्डकी प्रदेशमा कोरोना संक्रमितको संख्या ३ हजार २८० पुगेको छ।
त्यस्तै पछिल्लो २४ घण्टामा गण्डकीमा ४० जना कोरोना संक्रमित निको भएका छन्। योसँगै अहिलेसम्म निको हुनेको संख्या १ हजार ९७५ पुगेको छ।
गण्डकीमा अहिले सक्रिय संक्रमितको संख्या १ हजार २१२ रहेको छ।
प्रतिक्रिया