उपत्यकामा थप ६१ प्रहरीमा कोरोना संक्रमण

उपत्यकामा शुक्रबार थप ६१ प्रहरीमा कोरोना संक्रमण पुष्टि भएको छ। महानगरीय प्रहरी कार्यालयका अनुसार काठमाडौं प्रहरी परिसरका १५, ट्राफिक महाशाखाका १५, महानगरीय प्रहरी कार्यालयका १३ र ललितपुर परिसर र सातदोबाटो बृत्तका १८ जनामा कोरोना संक्रमण देखिएको हो।

यो सँगै झण्डै २१ सय प्रहरीमा कोरोना संक्रमण देखिएको छ। यसअघि २ हजार ३२ प्रहरीमा संक्रमण पुष्टि भइसकेको प्रहरी प्रवक्ता कुवेर कडायतले बताए। ती मध्ये १ हजार २ सय १२ जना आइसोलेसनमा छन्। ८ सय २० जना भने निको भएर डीयूटीमा फर्किसकेका छन्।

संक्रमितलाइ आइसोलेसनमा र कन्ट्याक ट्रेसिङमा परेका प्रहरीलाई क्वारेन्टिनमा राखिएको प्रवक्ता कडायतले बताए। संक्रमितको संख्या बढिरहेको भएपनि निको भएर काममा फर्किएकाले अहिले नै जनशक्ति अभाव नरहेको प्रधान कार्यालयले जनाएको छ।

उपत्यकामा संक्रमण बढ्दै गए र जनशक्ति अभावको अवस्था भए बाहिरका गणबाट ल्याउन सकिने बताउँदै अहिले भने प्रधान कार्यालयकै जनशक्ति जगेडामा रहेको बताए।