घाइते युवाको उपचारमा चौतारी युवा समूहद्वारा ४ लाख ६६ हजार सहयोग

सर्लाहीको हरिवन- ८ मा रहेको चौतारी युवा समूहले दुर्घटनामा परेर गम्भीर घाइते भएका हरिवनका एक युवालाई साढे चार लाख रुपैयाँ भन्दा धेरै आर्थिक सहयोग गरेको छ।

काम गर्ने क्रममा दुर्घटनामा परेर मेरुदण्डमा असर पर्दा दुवै खुट्टा नचल्ने अवस्थामा पुगेका हरिवन -८, हनुमान चोकका भोजबहादुर मगरको उपचारमा समूहले चार लाख ६६ हजार चार सय ८६ रुपैयाँ सहयोग गरेको हो।

चौतारी युवा समूहको १७ औँ वार्षिकोत्सवको अवसरमा समूहका संस्थापक अध्यक्ष रोशन दवाडीको सक्रियतामा सहयोग रकम जुटाइएको समूहका विनय तिमल्सिनाले जानकारी दिए।

‘देशविदेशका मनकारी साथीहरुबाट हामीले सहयोग संकलन गरेका हौँ,’ समूहका संस्थापक अध्यक्ष दवाडीले भने, ‘भोजबाहादुरको स्वास्थ्य र आर्थिक अवस्था दुबै नाजुक भएको पाएपछि हामीले उहाँको उपचारमा सहयोग संकलन अभियान चलाएका छौँ।’

लामो समय भक्तपुरको मध्यपुर थिमी अस्पतालमा उपचार गराएका मगरको हाल काभ्रेको एक अस्पतालमा उपचार (थेरापी) चलिरहेको छ।