पत्रकार बलराम बानियाँको मृत्यु : ‘अनुहारमा गहिरो चोट लागेको छ, सत्यतथ्य छानबिन होस्’

नेपाल प्रेस युनियनले कान्तिपुर दैनिकका सहायक सम्पादक बलराम बानियाँको मृत्युबारे गहिरो अनुसन्धान गर्न माग गरेको छ।

युनियनका महासचिव अजयबाबु शिवाकोटीले बुधबार शोक विज्ञप्ति जारी गरी नेपाल प्रेस युनियनका महाधिवेशन प्रतिनिधिसमेत रहेका बानिायाँको मृत्युसँग जोडिएका सबै पक्षको गहिरो अनुसन्धान गरी सत्यतथ्य बाहिर ल्याउन माग गरेका हुन्।

‘अनुहारमा गहिरो चोट लागेको अवस्थामा फेला परेका बानियाँको मृत्यु दुर्घटना, आत्महत्या वा हत्याका कारण भएको हो यकिन भएको छैन, यसबारे प्रहरीले गहिरो अनुसन्धान गरी सत्यतथ्य बाहिर ल्याउनुपर्छ,’ महासचिव शिवाकोटीले भने।

नेपाल पत्रकार महासंघका पूर्वकेन्द्रीय सचिवसमेत रहेका बानियाँको मृत्युको खबरले प्रेस युनियन मर्माहत भएको विज्ञप्तिमा उल्लेख छ। दुःखद घडीमा पत्रकार बानियाँप्रति श्रद्धाञ्जलि प्रकट गर्दै शोकसन्तप्त परिवारजनमा युनियनले समवेदना प्रकट गरेको छ।रासस