युनिकोड
आज बुधबार पनि काठमाडौँ उपत्यकामा पानी पर्ने सम्भावना देखिएको मौसम पूर्वानुमान महाशाखाका मौसमविद्ले बताएका छन्।
मौसमविद् रोजन लामिछानेका अनुसार काठमाडौँ उपत्यकामा आज पनि मंगलबारजस्तै साँझपख वर्षा हुने सम्भावना देखिएको हो।
‘तर वर्षाको सम्भावना हिजोभन्दा केही कम देखिएको छ’, उनले नेपालखबरसँग भने, ‘आज काठमाडौँ उपत्यकामा पानी पर्ने सम्भावना ४० प्रतिशत मात्र छ।’
मौसमविद् लामिछानेनका अनुसार आज दिनभरचाहिँ काठमाडौँ उपत्यकामा मौसम घाम-बादल, घाम बादलको अवस्थामा रहने अनुमान छ।
‘अनि अपराह्न वा साँझपख हल्का वर्षा हुने सम्भावना छ। कतै कतै मध्यमसम्म पनि हुन सक्छ’, उनले भने।
गएराति काठमाडौँ उपत्यकाका अधिकांश स्थानमा हल्का वर्षा भएको र केही ठाउँमा मध्यम वर्षा पनि भएको उनले बताए।
देशभरको मौसम र वर्षा सम्भावनाबारे भने मौसम महाशाखाले अहिले बिहान ८ बजे विस्तृत बुलेटिन जारी गर्नेछ।
प्रतिक्रिया