प्रहरीले धादिङ जिल्लाको दक्षिणी भेगबाट ठुलो परिमाणमा लागु औषध चरेस बरामद गरेको छ।
विशेष सूचनाको आधारमा जिल्ला प्रहरी कार्यालय धादिङ तथा ईलाका प्रहरी कार्यालय गजुरीबाट गएको प्रहरी टोलीले गजुरी गाउँपालिका–६ स्थित दरियालखोला पुल नजिक आदमघाट किरानचोक जाने कच्ची सडकमा मोटरसाइकल चेकिङका क्रममा सो परिमाणको लागु औषध फेला पारेको हो।
बा ९७ प ४९९ र प्रदेश ३-०२-००१ प ७४५८ नं को मोटर साइकलमा लुकाइछिपाई चरेस ल्याएको अवस्थामा प्रहरीले गजुरी गाउँपालिका–८ बस्ने वर्ष ३७ को टेक बहादुर तामाङ र महादेवखर्क बस्ने वर्ष २६ को बिशाल तामाङलाई पक्राउ गरेको छ। उनीहरुले ४ वटा बोरामा २५ केजीका दरले प्याक गरि ल्याएको अवैध लागु औषध चरेस सहित दुवैजनालाई पक्राउ गरिएको हो।
उनीहरुविरुद्ध अदालतबाट लागु औषध सम्बन्धी कसूर (चरेस) मुद्दामा १० दिनको म्याद थप गरी अनुसन्धान भइरहेको प्रहरीले जनाएको छ।
प्रतिक्रिया