भक्तपुरमा मृत फेला परेका दिदीबहिनी घरबाट भागेर आएका थिए

भक्तपुरको मध्यपुर थिमि नगरपालिका–९ सिन्टीटारको एक घरमा आज बिहान मृत अवस्थामा फेला परेका दुई किशोरी सुर्खेत घरबाट भागेर आएको खुलेको छ।
    
स्थानीय निरज चक्रधरको दुईतले घरको भुइँ तलामा डेरा गरी बस्ने दिदीबहिनी बिहीबार बिहान मृत फेला परेका थिए। 

सुर्खेत पञ्चपुरी नगरपालिका–८ घर भएकी १७ वर्षीया मेनुका कँडेल र १५ वर्षीया सिर्जना कँडेल सोही घरको प्यासेजमा एउटै डोरीले झुन्डिएको अवस्थामा मृत फेला परेका  प्रहरी वृत्त थिमिका प्रमुख प्रहरी नायब उपरीक्षक नवराज ढुंगानाले जानकारी दिए।
    
घरधनीका अनुसार दुई साता अघिमात्र ती किशोरीहरु डेरामा बस्न आएका थिए। प्रहरीका अनुसार मृतक दिदीबहिनी घरबाट भागेर आएको खुलेको छ। मृतकका आफन्त सम्पर्कमा आइनसकेकाले उनीहरु आएपछि मात्रै घटनास्थलको मुचुल्का तयार गरिने प्रहरीले जनाएको छ। 

घटनाबारे थप अनुसन्धान भइरहेको ढुंगानाले बताए।