कस्तो होला आज देशभरको मौसम?

हाल देशमा पश्चिमी वायु र स्थानीय वायुको प्रभाव छ। यसका साथै बंगालको खाडीबाट नेपालतर्फ भित्री रहेको जलवाष्पयुक्त हावाकोसमेत आंशिक प्रभाव नेपालको मौसमी प्रणालीमा परेको मौसम पूर्वानुमान महाशाखाले जनाएको छ।

यतिबेला कोसी, बागमती र गण्डकी प्रदेशका पहाडी भूभागको मौसम साधारणतया बदली छ। बाँकी भूभागमा मौसम मूख्यतया सफा रहेको मौसम पूर्वानुमान महाशाखाले जनाएको छ। 

महाशाखाका अनुसार अहिले कोसी, बागमती र गण्डकी प्रदेशका पहाडी भूभागको थोरै स्थानमा मेघगर्जन र चट्याङसहित हल्का वर्षा भइरहेको छ। काठमाडाैँ उपत्यकामा पनि अहिले हल्का वर्षा भइरहेकाे छ।

आज दिउँसो पनि देशका पहाडी भूभागका थोरै स्थान तथा बाँकी भूभागका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। 

साथै हिमाली भूभागका थोरै स्थानमा हल्का वर्षा र हिमपातकोसमेत सम्भावना रहेको महाशाखाले जनाएको छ।

मेघ गर्जन र चट्याङसहित हुनसक्ने वर्षा र हिमपातको कारण दैनिक जनजीवन, कृषि, स्वास्थ्य, सडक तथा हवाई यातायातमासमेत प्रभाव पर्न सक्ने हुँदा त्यसको असरबाट बच्नको लागि आवश्यक तयारी तथा सतर्कता अपनाउन पनि महाशाखाले सबैमा अनुरोध गरेको छ।