युनिकोड
राष्ट्रिय स्वतन्त्र पार्टीका सभापति रवि लामिछानेविरुद्धको सुप्रिम सहकारी ठगीको मुद्दामा आज बिहीबार पनि थुनछेक बहस नसकिने भएको छ।
जिल्ला न्यायाधीश प्रल्हादकुमार योगीको इजलासमा बहस भइरहेको हो। यसअघि बुधबार उनैको इजलासमा बयान सकिएपछि बिहीबारबाट थुनछेक बहस सुरु गरिएको छ।
जिल्ला सरकारी वकिल कार्यालय रुपन्देहीका ५ जना र उच्च सरकारी वकिल कार्यालय बुटवलका ३ जनाले बहस गर्ने भएकाले एकै दिनमा बहस नसकिने भएको हो।
दिउँसो २ बजे खाजा ब्रेकसम्म जिल्ला सरकारी वकिल कार्यालयका ५ जनाले बहस गरेका छन्। जिल्ला सरकारी वकिल कार्यालय रुपन्देहीका प्रमुख प्रेमराज पौडेल, सहायक जिल्ला न्यायाधिवक्ताहरु गोकर्णराज घिमिरे, सुनिल लामिछाने, वसन्तराज पोख्रेल र पवित्रा भण्डारीले बहस गरेका छन्।
अब खाजा ब्रेकपछि उच्च सरकारी वकिल कार्यालय बुटवलका प्रमुख सहन्यायाधिवक्ता सोमकान्ता भण्डारी, उपन्यायाधिवक्ताद्वय प्रकाश मरासिनी र रवि न्यौपानेले बहस गर्ने जिल्ला सरकारी वकिल प्रमुख प्रेमराज पौडेलले बताए।
अझै एक घण्टा भन्दा बढी अभियोजनकर्ता सरकारी वकिलकै तर्फबाट बहस हुने पौडेलले नेपालखबरलाई बताए। न्यायाधीश योगीले बहस सुरु हुने बेलामा आजै थुनछेक सक्ने बताएका थिए। उनले सरकारी वकिललाई एक घण्टामा बहस सक्न भनेका थिए। तर न्यायाधीशले भनेको समयमा बहस नसकिने भएको हो।
सरकारी वकिलको बहसपछि जाहेरवालाको तर्फबाट बहस हुनेछ। वरिष्ठ अधिवक्ता दिनेश त्रिपाठी र सुरेन्द्र भण्डारी बहसका लागि अदालत पुगिसकेका छन्।
यसअघि उनीहरूले पोखराको सूर्यदर्शन सहकारी र काठमाडौँको स्वर्णलक्ष्मी सहकारीको मुद्दामा पनि जाहेरवालाको तर्फबाट बहस गरेका थिए।
आज जाहेरवालाको तर्फबाट पनि बहस सकिए शुक्रबार रविको तर्फबाट बहस हुनेछ। त्यसपछि सरकारी वकिल र जाहेरवालाको तर्फबाट जवाफी बहस भएपछि शुक्रबार नै आदेश आउने सम्भावना छ।
रविलाई मुद्दा हेर्दाहेर्दैमा रहँदा पनि न्यायाधीशले हिरासतमा नराखी परिवारको जिम्मा लगाएर पठाउने आदेश गरेका छन्। बुधबार बयानपछि उनलाई पत्नी निकिताको जिम्मा लगाएर पठाइएको थियो। बिहीबार उनी इजलासले भनेकै समयमा उपस्थित भएका छन्।
आज पनि उनलाई थुनामा नपठाई परिवारकै जिम्मा लगाउने सम्भावना छ। रविविरुद्ध सुप्रिम सहकारी ठगीको अभियोगमा साढे चार करोड बिगो कायम गरेर सहकारी ठगी र सङ्गठित अपराधको कसुरमा मुद्दा दायर गरिएको छ। पूरक अभियोगमा २२ जनालाई प्रतिवादी बनाइए पनि रवि पहिले अदालतमा उपस्थित भएका हुन्।
यसअघि उनी सूर्यदर्शन सहकारीको मुद्दामा ६५ लाख र स्वर्णलक्ष्मी सहकारीको मुद्दामा ६० लाख धरौटीमा रिहा भएका थिए।
प्रतिक्रिया