युनिकोड
संखुवासभा जिल्ला कारागार खाँदबारीमा दुई जना कैदी हत्या प्रकरणका अभियुक्तसँग बयान सुरू भएको छ।
हत्या प्रकरणमा जोडिएका १५ जना अभियुक्तसँग आइतबारदेखि बयान सुरू भएको हो।
हत्यामा संलग्न भएको अभियोगमा सात प्रहरी र आठजना कैदीबन्दीविरूद्ध जिल्ला अदालत संखुवासभा चैनपुरमा शुक्रबार कर्तव्य ज्यान मुद्दा दायर गरिएको थियो।
जिल्ला न्यायाधीश टेकनाथ गौतमको इजलासमा कैदी हत्या प्रकरणका अभियुक्तसँग बयान सुरू भएको भएको जिल्ला अदालतका स्रेस्तेदार रामचन्द्र केसीले जानकारी दिए।
उनका अनुसार घटनामा संलग्न भएको अभियोग लागेका १५ जनासँग बयान थालिएको हो। अभियुक्तको बयान सकिन तीनदेखि चार दिनसम्म लाग्न सक्नेछ।
कैदी हत्या घटनामा प्रहरी सहायक निरीक्षक लक्ष्मी चौधरी, प्रहरी जवान सुमन गुरूङ, कारागार सुरक्षा गार्ड दमनसिंह राई, हवल्दार राजकुमार श्रेष्ठ, जवान पवनकुमार महतो, सुरक्षा गार्ड नुसन राईविरुद्ध कर्तव्य ज्यान मुद्दा दर्ता गरिएको छ।
त्यस्तै, कैदीको मृत्यु घटनामा कारागारमा कैद भुक्तान गरिरहेका आठ जनाविरूद्ध कर्तव्य ज्यान शीर्षकमा मुद्दा दर्ता गरिएको छ। चौकीदार राम कार्की, बडानाइके अनिष शर्मा कट्टेल, सचिन राई, सहनाइके सुमन सारूमगर, टीकाराम चौहान, नवीनकुमार राई तथा कैदीहरू मीनबहादुर तामाङ र इन्द्रध्वज घिमिरेविरूद्ध पनि कर्तव्य ज्यान मुद्दा दर्ता गरिएको हो।
भाग्न खोजेका कैदीलाई नियन्त्रणमा लिएर सुरूमा उनीहरूले कुटपिट गरेर यातना दिएको सिसिटिभी क्यामरा फुटेजमा देख्न सकिन्छ। बाहिर कुटेर दुवै जनालाई कारागारभित्र छिराइएको थियो
गत साउन २४ गते संखुवासभाको मादी नगरपालिका–५ का २० वर्षीय विनोद तोलांगी र नुवाकोटको ककनी गाउँपालिका–७ का २८ वर्षीय आकाश बलामीको सुरक्षाकर्मी र केही कैदीबन्दीको कुटपिटबाट मृत्यु भएको थियो।
कारागारका तीन कर्मचारीसहित ६ जनाविरूद्ध मुद्दा नचल्ने जिल्ला कारागारका तीन कर्मचारी र तीनजना प्रहरीविरूद्ध मुद्दा नचल्ने निर्णय भएको छ।
निमित्त जेलर राजेन्द्र घिमिरे भदौ ६ गते पक्राउ परेका थिए। उनलाई त्यही दिन हाजिर जमानीमा छाडिएको थियो। उनीविरूद्ध पीडित परिवारले किटानी जाहेरी दिएका थिए।
कारागारका सहायक कम्प्युटर अपरेटर यादव र कार्यालय सहयोगी कार्की भदौ १३ गते पक्राउ गरिएको थियो। प्रहरी जवानहरू कार्की, विक र सोङमीलाई अनुसन्धानका क्रममा भदौ १४ गते पक्राउ गरिएको थियो।
जिल्ला अदालत संखुवासभाले कारागारका तीन कर्मचारी र तीनजना प्रहरीलाई शुक्रबार छाडिसकेको छ। मुलुकी अपराधसंहिता, २०७४ को दफा १८६ बमोजिम क्षतिपूर्ति, अपराध पीडित संरक्षण ऐन, २०७५ को दफा ४१ बमोजिम क्षतिपूर्ति मागसहित मुद्दा दर्ता गरिएको छ।
मुलुकी अपराधसंहिता, २०७४ को दफा ४१, दफा १७७ र दफा १८६ र अपराध पीडित संरक्षण ऐन, ७५ को क्षतिपूर्तिसम्बन्धी व्यवस्था आकर्षित हुने गरी मुद्दा दर्ता गरिएको जिल्ला सरकारी वकिल कार्यालयका वकिल सन्तोषप्रसाद भण्डारीले बताए। रासस
प्रतिक्रिया