‘बिरामीलाई भेट्नु छ’ भन्दै वीर अस्पताल पुगेका एक व्यक्तिले अस्पतालको छतबाट फाल हानेका छन्।
वीर अस्पतालको छैटौं तलाबाट फाल हानेका करिब ४० वर्षीय ती पुरुषको मृत्यु भएको प्रहरी परिसर काठमाडौँका एसपी कुमोद ढुंगेलले जानकारी दिए। मृतकको पहिचान खुलेको छैन।
वीर अस्पतालका सूचना अधिकारी सागर मिश्रका अनुसार सर्जिकल भवनको छैटौँ तलाबाट हाम फालेका ती पुरुषको उपचारको क्रममा मृत्यु भएको हो।
आइतबार बिहान करिब अढाई बजे उनी बिरामीको आफन्त हुँ भन्दै अस्पतालभित्र प्रवेश गरेका थिए। त्यसपछि सरासर छैटौँ तलामाथि पुगेर उनले फाल हानेका थिए।
ती व्यक्तिले फाल हानेपछि अस्पताल प्रशासनले उनका बिरामी आफन्तको खाजी गरेको थियो। तर, खोजी गर्दा उनका कोही बिरामी आफन्त अस्पतालमा नपाइएको सूचना अधिकारी मिश्रले बताए।
उनको शव हाल वीर अस्पतालको शव गृहमा राखिएको छ। घटनाको सम्बन्धमा थप अनुसन्धान भइरहेको एसपी ढुंगेलले बताए।
Shares
प्रतिक्रिया