युनिकोड
अर्थमन्त्री डा. प्रकाशशरण महतले राज्यको क्षमता, राष्ट्रिय संरचनाको क्षमता, आर्थिक, सामाजिक नीतिलाई सशक्त ढंगबाट कार्यान्वयन गर्ने क्षमता र परराष्ट्र सम्बन्धलाई सशक्त ढंगले प्रस्तुत गर्ने क्षमता नेपालले विकसित गर्नुपर्ने आवश्यकता रहेको बताएका छन्।
बिहीबार इन्स्टिच्युट फर स्टाटेजी एन्ड सोसियो इकोनोमिक रिसर्चले आयोजना गरेको साना राज्यको क्षमतासम्बन्धी गोष्ठीमा नेपालमा नेभिगेटिङ प्रतिस्पर्धा र परराष्ट्र नीतिका प्राथमिकताबारे सम्बोधन गर्दै मन्त्री डा. महतले यसो भनेका हुन्।
‘प्रतिस्पर्धाबीच हामीले कसरी हाम्रो प्राथमिकता सेट गर्नुभन्दा अगाडि हामीले हाम्रो क्षमता वृद्धि गर्नुपर्ने आवश्यकता छ’, उनले भने।
उनले सबैले आफ्नो देशलाई केन्द्रबिन्दुमा राखेर परराष्ट्रनीति सञ्चालन गरिरहेका बताए।
‘सानो वा ठूलो देशले आफ्नो देशलाई केन्द्रबिन्दुमा राखेर परराष्ट्र नीति सञ्चालन गरेका हुन्छन्। कस्तो खालको परराष्ट्र नीति अवलम्बन गर्दा राष्ट्रहित र राष्ट्रिय स्वार्थको परिपूर्ण हुन्छ, त्यसैका आधारमा परराष्ट्र नीति सञ्चालन हुनुपर्ने’, महतले भने, ‘हामीले पनि त्यही गर्नुपर्छ। हामीले सोच्ने भनेकै देशका लागि हो।’
चीन, भारत वा अमेरिकासँग हामीले डिल गर्दा हामीले हाम्रा कुरालाई बढी प्राथमिकतामा राखेर कुरा गरियो भने नेपालले आफ्नो कुरा गरिरहेको छ भनेर उनीहरुले बुझ्ने पनि उनले बताए।
सुस्पष्ट ढंगले प्रस्तुत हुने हो भने छिमेकले कतै नेपाल मेरोविरुद्ध त छैन भनेर प्रश्न गर्न सक्ने अवस्थाबाट आफूहरु मुक्त हुने उनले बताए। ‘हामी कुनै पनि मित्र राष्ट्रविरुद्ध प्रयोग हुँदैनौं, हामीले हाम्रो हित मात्र हेरिरहेका छौँ’, उनले भने।
अवसरलाई सुक्ष्म आँखाले हेर्नुपर्ने अर्थमन्त्री डा. महतको भनाइ छ।
‘हालै म एउटा कार्यक्रममा क्यानडा गएँ। कार्यक्रम सकिएपछि नेपाली समुदायसँग भेटघाट गरेँ। मैले प्राप्त गरेको सूचनाअनुसार धेरै विद्यार्थीको त्यहाँ बेहाल छ। नेपालमा गुणस्तरीय शिक्षा नभएर मात्र उनीहरु त्यहाँ गएका होइनन, त्यहाँको विश्वविद्यालय पैसा कमाउने उद्योग हुन्’, मन्त्री डा. महतले भने, ‘जो क्षमतावान छन्, जसले छात्रवृत्ति पाएका छन् उनीहरुलाई नजाऊ भन्न मिल्दैन।’
प्रतिक्रिया