युनिकोड
नक्कली शरणार्थी प्रकरणमा मुछिएर थुनामा पठाउन आदेश भएका भीआईपीसहित सबै १६ जनालाई केन्द्रीय कारागार सुन्धारामा राखिने भएको छ।
यसअघिका मुद्दामा भीआईपीहरुलाई डिल्ली बजार कारागारमा राखिने गरे पनि यो प्रकरणका सबै १६ जनालाई सुन्धारा कारागारमा राख्न आदेश भएको हो।
नेपाली क्रिकेट टोलीका पूर्वकप्तान सन्दीप लामिछाने पनि यही कारागारमा तीन महिना बिताएर गत पुस २९ गते रिहा भएका थिए।
काठमाडौं जिल्ला अदालतका न्यायाधीश प्रेमप्रसाद न्यौपानेको इजलासले यो प्रकरणमा लक्ष्मी महर्जन र टंक गुरुङबाहेक अरु सबैलाई थुनामा पठाउने आदेश दिएको छ।
अदालतले नेकपा एमालेका नेता एवम् पूर्वउपप्रधानमन्त्री टोपबहादुर रायमाझी, नेपाली कांग्रेसका नेता एवम् पूर्वगृहमन्त्री बालकृष्ण खाँणसहित १६ जनालाई जेल चलान गर्न आदेश दिएको हो।
त्यसैगरी तत्कालीन गृहसचिव टेकनारायण पाण्डे, भुटानी शरणार्थी नेता टेकनाथ रिजाल, तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, हज कमिटीका अध्यक्ष शमशेर मियाँ, पूर्वसभासद् आङटावा शेर्पा, तत्कालीन गृहमन्त्री खाँणका स्वकीय सचिव नरेन्द्र केसी र टोपबहादुर रायमाझीका छोरा सन्दीप रायमाझी पनि सुन्धारा जेलमा चलान हुने भएका छन्।
बिचौलियका रुपमा चिनिएका केशव दुलाल, सानु भण्डारी, सन्देश शर्मा, सागर राई, गोविन्द चौधरी र रामशरण केसी पनि थुनामा जाँदै छन्।
प्रतिक्रिया