युनिकोड
आज (शुक्रबार) देशका पहाडी भेगमा हल्कादेखि मध्यमसम्म वर्षा हुने सम्भावना छ।
मौसम पूर्वानुमान महाशाखाका अनुसार आज दिउँसो कोशी, बागमती र गण्डकी प्रदेशका पहाडी भूभागका केही स्थान तथा देशका बाँकी पहाडी भेगमा थोरै ठाउँमा हल्कादेखि मध्यम वर्षा हुने देखिएको हो। कोशी प्रदेशका भने तराईमा पनि एक/दुई स्थानमा मेघगर्जन/चट्याङसहित हल्कादेखि मध्यम वर्षाको सम्भावना छ।
महाशाखाका मौसमविद् रोजन लामिछानेका अनुसार काठमाडौं उपत्यकामा पनि दिउँसो हल्का वर्षा हुने सम्भावना छ।
यस्तै राति कोशी, बागमती र गण्डकी प्रदेशका पहाडी भूभागका केही स्थान तथा कोशी प्रदेशका तराई र मधेश प्रदेशसहित देशका बाँकी पहाडी भूभागका थोरै ठाउँमा मेघगर्जन/चट्याङसहित हल्का वर्षाको सम्भावना रहेको महाशाखाले जनाएको छ।
अहिलेसम्म मनसुन कोशीदेखि गण्डकी प्रदेशसम्म फैलिएको र त्यस उता पश्चिम पुगिनसकेको मौसमविद् लामिछानेले जानकारी दिए। यसैले लुम्बिनी, कर्णाली र सुदूरपश्चिम प्रदेशका पहाडी भेगमा पश्चिमी वायुको प्रभावले केही बदली र हल्का वर्षा भए पनि यी प्रदेशका तराईमा भने २ हप्ताभन्दा बढी समयदेखि बदली र वर्षा हुन नसकेको उनले बताए। जसका कारण ती प्रदेशका तराईमा उखरमाउलो गर्मी भइरहेको छ।
प्रतिक्रिया