युनिकोड
सुनसरी जिल्लाको धरान उपमहानगरपालिका १३ शिवधारास्थित कोशी राजमर्गबाट सशस्त्र प्रहरीले २२७ किलो ४ सय ग्राम गाँजासहित २ जना व्यक्ति र ट्रक नियन्त्रणमा लिएको छ।
सशस्त्र प्रहरी बल, नेपाल सुरक्षा वेश धरानले धनकुटाबाट ईटहरीतर्फ जाँदै गरेको प्रदेश १–०२–००१ ख ९४८९ नम्बरको ट्रकमा ८ वटा पोकामा लैजाँदै गरेको उल्लेखित परिमाणको गाँजा नियन्त्रणमा लिएको हो।
सशस्त्रले गाडी चालक धनकुटा जिल्लाको छथर जोरपाटी गाउँपालिका ६ बस्ने ३४ वर्षीया चन्द्र थापा क्षेत्री र सहचालक तेह्रथुम जिल्लाको छथर गाउँपालिका २ बस्ने २८ वर्षीया चुडामणि कटुवाललाई पनि पक्राउ गरेको छ।
उनीहरुको साथबाट ६० हजार नेपाली रुपैयाँ, ४ वटा मोबाइल सेट, बाटोको ईजाजत पत्र र सवारी दर्ता प्रमाणपत्र समेत बरामद भएको छ।
नियन्त्रणमा लिइएका उनीहरुलाई ट्रक, गाँजा र बरामद सामाग्रीसहित आवश्यक कारबाहीको लागि ईलाका प्रहरी कार्यालय धरानमा बुझाइएको छ।
प्रतिक्रिया