युनिकोड
मतगणना चलिरहेका मधेशका चार जिल्लामा प्रतिनिधिसभातर्फ स्वतन्त्रबाट ६ जना उम्मेदवारले अग्रता कायम राखेका छन्।
सत्तारुढ पाँचदलीय गठबन्धन र एमाले राजपा गठबन्धनका उम्मेदवारलाई पछि पार्दै राजनीतिक दलका बागी र स्वतन्त्रले अग्रता बनाएका हुन्।
प्रतिनिधिसभा तर्फ महोत्तरी ४, सर्लाही १ र ४, रौतहट २ र ३ तथा बारा २ मा स्वतन्त्र उम्मेदवारले अग्रता कायम राखेका हुन्।
महोत्तरी ३ मा सत्तारुढ गठबन्धनका उम्मेदवार लोसपाका अध्यक्ष महन्थ ठाकुरलाई पछि पार्दै एमालेबाट बागी उठेका स्वतन्त्र उम्मेदवार रामआधार कापरले अग्रता कायम राखेका छन्।
कापरले २ हजार २०४ मत प्राप्त गर्दा ठाकुरले १ हजार १९६ मत पाएका छन्। यो क्षेत्रमा एमाले जसपा गठबन्धनबाट जसपाका हरिनारायण यादवले १ हजार ९९ मत ल्याएका छन्।
त्यसैगरी सर्लाही १ मा पनि एमालेका बागी उम्मेदवार मानबहादुर खड्काले दुबै गठबन्धनका उम्मेदवारलाई पछि पारेका छन्।
खड्काले ३ हजार ३८७ मत प्राप्त गर्दा लोसपाका रामप्रकाश चौधरीले ३ हजार १३८ मत पाएका छन्। यो क्षेत्रमा एमाले जसपा गठबन्धनका प्रमोद साहले २ हजार ३३६ मत पाएका छन्।
त्यसैगरी सर्लाही ४ मा कांग्रेसका बागी अमरेश सिंह दुबै गठबन्धनका उम्मेदवार भन्दा अघि छन्।
कांग्रेसबाट निर्वाचित निवर्तमान सांसदसमेत रहेका अमरेशले २ हजार २५९ मत पाउँदा सत्तारुढ गठबन्धनबाट उम्मेदवार बनेका कांग्रेसका नागेन्द्रकुमार यादवले २ हजार २५४ मत पाएका छन्। यहाँ सिंह र यादवबीचको मतान्तर ५ मात्रै छ।
त्यसैगरी रौतहटका दुई क्षेत्रमा स्वतन्त्र उम्मेदवार अघि छन्। रौतहट २ मा स्वतन्त्रबाट किरणकुमार साहले ४ हजार ८०१ मत प्राप्त गर्दा कांग्रेसका फिरदोस आलमले ३ हजार ७३० मत पाएका छन्।
रौतहट ३ मा पनि स्वतन्त्र उम्मेदवार प्रभु साह अघि छन्। उनलाई पछ्याउने प्रतिस्पर्धी उम्मेदवार पनि स्वतन्त्र नै छन्। पूर्व माओवादी नेता साहले एमालेको टिकट त्यागेर स्वतन्त्रबाट उम्मेदवारी दर्ता गरेका हुन्।
साहले ६ हजार २५३ मत प्राप्त गर्दा अर्का स्वतन्त्र उम्मेदवार ओमप्रकाश अग्रवालले ३ हजार ७५१ मत प्राप्त गरेका छन्। यो क्षेत्रमा सत्तारुढ गठबन्धनले साहलाई समर्थन गरेपनि माओवादीका रविन्द्र पटेलले १ हजार ७५९ मत पाएका छन्। उनले प्रभु साहलाई समर्थन नगरी आफैँलाई मत मागेका थिए।
त्यसैगरी बारा २ मा पनि स्वतन्त्र उम्मेदवार रामकिशोर प्रसाद यादव अघि छन्। उनले ३ हजार १३० मत प्राप्त गर्दा माओवादी केन्द्रका शिवचन्द्र प्रसाद कुशवाहाले २ हजार ४०३ मत मात्रै पाएका छन्।
यो क्षेत्रमा राजपाका रामसहायप्रसाद यादवले १ हजार २९५ मत ल्याउँदा अर्का स्वतन्त्र उम्मेदवार रविन्द्र प्रसाद यादवले १ हजार १५७ मत पाएका छन्।
प्रतिक्रिया