नेकपा एमालेकी नेत्री रामकुमारी झाँक्रीले पार्टीका अध्यक्ष केपी शर्मा ओलीले पार्टीभित्र एकता कायमका लागि भन्दै जारी गरेको वक्तव्य स्वार्थ पूरा गर्ने षडयन्त्र भएको आरोप लगाएकी छन्।
प्रधानमन्त्रीसमेत रहेका एमाले अध्यक्ष ओलीले आइतबार साँझ पार्टीलाई २०७५ जेठ ३ पूर्वको अवस्थामा फर्काउने घोषणा गर्दै असन्तुष्ट माधव नेपाल पक्षसमक्ष ६ बुँदे प्रस्ताव राखेका छन्।
यो प्रस्ताव सञ्चारमाध्यममा सार्वजनिक हुनासाथ नेपाल पक्षका नेताहरू पनि दुई धारमा विभाजन भएका छन्। एउटा– सहमति गनृुपर्छ भन्ने त अर्काे हुँदैन भनिरहेका छन्।
नेत्री झाँक्री पनि ओलीको प्रस्ताव अमल्याउने र धोका दिने अस्त्र मात्र भएको धारणा राख्छिन्।
वक्तव्य जारी गर्दै नेत्री झाँक्रीले भनेकी छन्, ‘पढ्दै जाँदा लाग्यो– पार्टीको एकता खास उद्देश्यका लागि थियो र एकता भंग पनि खास उद्देश्य पूरा गर्न योजनागत ढंगले गरिएको कुरा दिनको घामजस्तै छ।’
नेत्री झाँक्रीको वक्तव्य जस्ताको तस्तै :
भर्खरै मिडियामा अध्यक्ष क। खड्गप्रसाद ओलीको नामबाट आएको वक्तव्य पढ्न पाइयो। सुरुमा यो वक्तव्य देखेर म पनि खुसी भएँ। उत्साहित हुँदै पढेँ। पढ्दै जाँदा लाग्यो– पार्टीको एकता खास उद्देश्यका लागि थियो र एकता भंग पनि खास उद्देश्य पूरा गर्न योजनागत ढंगले गरिएको कुरा दिनको घामजस्तै छ।
अब रह्यो, नेकपा एमालेको एकताको कुरा : यो साँच्चै एकताको लागि गरिएको भए एकता गर्नुपर्ने दुई पक्षबीचमा सहमति गरी वरिष्ठ नेता कमरेड माधव नेपालसहितको संयुक्त वक्तव्यको रूपमा आउँथ्यो। एकतर्फी घोषणा गरेर एकता गर्न खोजिएको होइन, झुक्याउन, अलमल्याउन र मिडिया कन्जम्सनका लागि हो भनेर बुझ्नुपर्छ।
अझ गम्भीर कुरा त के छ भने बुदा नं. ४ मा अदालतमा दिएको हस्ताक्षर फिर्ता गरिनेछ भनिएको छ। यो कसले फिर्ता लिने? फिर्ता लिने पक्षसँग यो वक्तव्य जारी गर्न सहमति वा संवाद आवश्यक पर्ने होइन र? लोकतन्त्रको रक्षाको लागि संविधानलाई क्रियाशील गराउन, संसद पुनःस्थापना गर्न, हामी अदालतको ढोका ढकढकाउन पुगेका थियौँ। हामीहरूले यसको सुनिश्चिताबिना हस्ताक्षर फिर्ता लिने भन्ने प्रश्न नै आउँदैन। त्यसैले यो एक प्रकारले पार्टी एकता हुन नदिने डिजाइनका साथ आएको वक्तव्य हो। यसप्रति भ्रममा नपर्न अनुरोध गर्दछु। विकसित घटनाक्रम र समग्र पछिल्लो राजनीतिक परिस्थितिबारे हाम्रो पार्टीको स्थायी कमिटी बैठक बसी संस्थागत धारणा दिइनेछ।
प्रतिक्रिया