युनिकोड
वाग्मती प्रदेश राष्ट्रिय सभा उपनिर्वाचनमा खिमलाल देवकोटा निर्वाचित भएका छन्।
भर्खरै प्राप्त अन्तिम मतपरिणामअनुसार नेकपा एमाले माधव नेपाल पक्षका उम्मेदवार डा. खिमलाल देवकोटाले प्रदेशमा ५८ र स्थानीय तहमा १२८ मत प्राप्त गरी विजयी भएका हुन्।
निर्वाचन आयोगका प्रमुख निर्वाचन अधिकृत न्यायाधीश डिल्लीरत्न श्रेष्ठका अनुसार देवकाेटाले प्राप्त गरेको कुल मतभार ५ हजार ८८ रहेको छ।
त्यसैगरी उनका प्रतिद्वन्द्वी नेकपा एमालेका उम्मेदवार रामबहादुर थापा ‘बादल’ले प्रदेश सभाबाट ४५ र स्थानीय तहबाट १०३ मत ल्याए। थापाले प्राप्त गरेको मतभार ४ हजार ४१ रहेको छ।
यस्तै नेपाल मजदुर किसान पार्टीका उम्मेदवार कृष्णबहादुर तामाङले स्थानीय तहबाट २ र प्रदेश सभाबाट पनि २ मत प्राप्त गरे। उनले पाएको मतभार १३२ रहेको छ।
बिहीबार बिहान मकवानपुरको हेटौंडास्थित भुटनदेवी उच्चमाविको प्रांगणमा मतदान भएको हो। निर्वाचनमा ९७.४० प्रतिशत मत खसेकाे थियाे।
प्रदेश सांसदतर्फ १०९ र स्थानीय तहका २३८ मतदाता गरी कुल मतदाता ३४७ थिए। तर ९ जना मतदाता उपस्थित भएनन्। त्यसमध्ये विवेकशील साझाका ३ जनाले मतदान नै नगर्ने घाेषणा गरेका थिए।
११० सदस्य रहेको प्रदेश सभामा दोलखाका सांसद पशुपति चौलागाईंको गत साता निधन भएपछि प्रदेश सभातर्फ १०९ मतदाता रहेका थिए।
विजेता देवकोटालाई नेपाली कांग्रेस र माओवादीले समेत मतदान गरेका थिए। त्यसको फाइदा उठाउँदै देवकोटा राष्ट्रिय सभा सदस्यमा निर्वाचित भएका हुन्।
प्रतिक्रिया