युनिकोड
प्रधानमन्त्री एवम् नेकपा एमालेका अध्यक्ष केपी शर्मा ओली र नेता माधवकुमार नेपालबीच वार्ता हुने भएको छ।
स्थायी कमिटीका सदस्य सुवास नेम्वाङका अनुसार राष्ट्रिय सभाको वागमती प्रदेशअन्तर्गत हुनलागेको उपनिर्वाचनमा उठाउने उम्मेदवार, पार्टीभित्र देखा परेका विवादलगायत समस्या समाधानका विषयमा आज ओली र नेपालबीच वार्ता हुनलागेको हो।
उनले वार्तास्थल भने बताउन चाहेनन्।
यसअघि ओली र नेपालबीच होटेल मेरियटमा दुईपटक वार्ता भएको थियो। दुवै वार्तामा ठोस प्रगति हुन नसकेपछि ओली नेपालपक्षप्रति आक्रामक बन्दै आएका छन्।
यसैबीच, ओली र नेपालबीच संवादको तयारी भइरहेका बेला एमाले ओली पक्षको स्थायी कमिटीको बैठक बसेको छ।
प्रधानमन्त्री निवास बालुवाटारमा बैठक बसेको नेम्वाङले जानकारी दिए।
‘उपनिर्वाचनको उम्मेदवार चयनकै विषयमा स्थायी कमिटीका सदस्यहरुसँग औपचारिक र अनौपचारिक छलफल भइरहेका छन्’, नेम्वाङले नेपालखबरसँग भने, ‘उम्मेदवारको टुंगो लगाएर मनोनयन गर्नुपर्ने भएको छलफल भएको हो। ’
रामबहादुर थापाले अनिच्छा देखाएपछि उपनिर्वाचनमा कसलाई उठाउने एमालेले निर्णय गर्न सकेको छैन।
बिहीबार प्रधानमन्त्री ओली, स्थायी कमिटी सदस्य घनश्याम भुसाल र योगेश भट्टराईबीच बालुवाटारमा विशेष वार्ता भएको थियो।
माधवकुमार नेपालसहित ४ नेतामाथि लगाइएको कारबाही फिर्ता लिनुपर्ने भुसाल र भट्टराईले प्रधानमन्त्री ओलीलाई आग्रह गरेका थिए।
प्रतिक्रिया