युनिकोड
सभामुख अग्निप्रसाद सापकोटाले कार्यव्यवस्था समितिको बैठक बोलाएका छन्।
प्रतिनिधि सभा पुनर्स्थापना भएपछि पहिलोपटक सो समितिकाे बैठक गर्न लागिएकाे हो।
आज सोमबार दिउँसो २ बजे कार्यव्यवस्था बैठक बस्ने सभामुख सापकोटाको सचिवालयले जनाएको छ।
आजको बैठकमा प्रतिनिधि सभामा प्रतिनिधित्व गर्ने एमाले, माओवादी केन्द्र, कांग्रेस र जसपालगायत दलका प्रतिनिधि बोलाइएको छ।
मंगलबार दिउँसो १ बजेका लागि बोलाइएको प्रतिनिधि सभा बैठकको कार्यसूची तय गर्न कार्यव्यवस्था समितिको बैठक डाकिएको सचिवालयले जनाएको छ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीद्वारा पुस ५ गते गरिएको प्रतिनिधि सभाको विघटनलाई सर्वोच्च अदालतले बदर गरेपछि पुनर्स्थापना भएको हो।
पुनःस्थापनापछि फागुन २३ गते बसेको पहिलो बैठकमा संवैधानिक परिषद्सम्बन्धी अध्यादेश पेस गरेपछि प्रमुख प्रतिपक्षी दल नेपाली कांग्रेस र जनता समाजवादी पार्टीले बैठक अवरुद्ध गरेका थिए।
त्यसपछि २६ गते बसेको दोस्रो बैठकमा बहालवाला र पूर्वसहित १४ सांसदको निधनमा शोक प्रस्ताव पारित गरेर चैत ३ गतेको लागि बैठक राखिएको हो। ती दुवै बैठकका कार्यसूची तय गर्न भने सभामुखले कार्यव्यवस्थाको बैठक राखेका थिएनन्।
प्रतिक्रिया