कृषि क्षेत्रमा विदेशीले पनि लगानी गर्न पाउने सरकारी निर्णयको पूर्वप्रधानमन्त्री तथा जनता समाजवादी पार्टीका अध्यक्ष डा.बाबुराम भट्टराईले विरोध गरेका छन्।
शुक्रबार बिहान सामाजिक सञ्जालमार्फत् नेता भट्टराईले कृषि क्षेत्रमा विदेशी लगानी खुला गर्ने सरकारी निर्णयलाई गलत, जनघाती र राष्ट्रघाती भन्दै विरोध गरेका हुन्।
कृषि क्षेत्रमा पनि विदेशीले लगानी गर्न पाउने गरी मन्त्रिपरिषदले ‘विदेशी लगानी तथा प्रविधि हस्तान्तरण ऐन–२०७५’ स्वीकृत गरेको छ। यसअघि कृषि क्षेत्रमा विदेशीले लगानी गर्न नपाउने व्यवस्था थियो। मन्त्रिपरिषद्ले सर्त राखेर कृषि क्षेत्रमा प्रत्यक्ष वैदेशिक लगानी (एफडीआई) खुला गर्ने निर्णय गरेको हो।
नेता भट्टराईले छापामार शैलीमा ओली सरकारले कृषि क्षेत्रमा विदेशी लगानी खुलागर्ने निर्णय गरेको भन्दै विरोध गरेका छन्।
‘छापामार शैलीमा ओली सरकारले कृषि क्षेत्रमा विदेशी लगानी खुलागर्ने जुन निर्णय गरेको छ, त्यो सबै हिसाबले गलत, जनघाती, राष्ट्रघाती छ,’ नेता भट्टराईले ट्विटरमा लेखेका छन्, ‘यसले उसै थला परेको कृषि झन् बर्बाद हुनेछ। किसान वेदखल हुनेछन्। खाद्यसुरक्षा धरापमा पर्नेछ। अर्थतन्त्र अरू परनिर्भर हुनेछ। सबैले प्रतिरोध गरौं।ओली हटाऊॅ देश बचाऊॅ।’
कृषि विज्ञहरुले पनि कृषि क्षेत्रमा विदेशी लगानी खुला गर्ने निर्णयको विरोध गरेका छन्।
Shares
प्रतिक्रिया