युनिकोड
जम्मु-कस्मिर जिल्ला विकास परिषद् (डीडीसी) का २८० सिटका लागि भएको निर्वाचनमा फारुक अब्दुल्ला नेतृत्वको ७ पार्टीको गुपकर गठबन्धनले सबैभन्दा बढी ११३ सिट जितेको छ।
समाचार एजेन्सी पीटीआईका अनुसार ७३ सिटका साथ भारतीय जनता पार्टी (बीजेपी) एक्लै सबैभन्दा ठूलो पार्टी बनेको छ। बीजेपीले पहिलोपटक कस्मिर उपत्यकामा ३ सिट जितेको छ।
केन्द्र प्रशासित राज्यस्थित निर्वाचन आयोगका अनुसार पिपुल्स अलायन्स फर गुपकर डिलेक्रेसन (पीएजीडी) सय सिट जितेको छ भने १२ स्थानमा ऊ अगाडि देखिएको छ।
४७ स्वतन्त्र उम्मेदवारले जित हासिल गरेका छन् भने अन्य ६ स्वतन्त्र उम्मेदवार अगाडि बढिरहेका छन्।
जम्मु-कस्मिर अपनी पार्टी (जेकेएपी) को अवस्था भने निराशाजनक देखिएको छ। यस पार्टीले ११ सिटमा मात्रै विजय प्राप्त गरेको छ र एक स्थानमा अग्रता लिइरहेको छ।
कांग्रेसले अहिलेसम्म २२ सिटमा जित हासिल गरेको छ भने अन्य ५ स्थानमा अगाडि देखिएको छ।
बीबीसीका अनुसार ८ चरणमा गरिएको डीडीसी चुनाव गत नोभेम्बर २८ मा सुरु भएको हो।
गत वर्ष जम्मु–कस्मिरलाई दिइएको विशेष मान्यता खारेज गरिएपछि तथा केन्द्र शासित प्रदेश बनाइएपछिको यो पहिलो चुनाव हो।
जम्मु-कस्मिर क्षेत्रका १४०-१४० सिटका लागि चुनाव भएको थियो।
हिन्दुबाहुल्य जम्मुमा नतिजा बीजेपीका पक्षमा देखिएको छ भने मुसलमान बाहुल्य कस्मिरमा पीएजीडीको दबदबा देखिएको छ। बीबीसी
प्रतिक्रिया