चीनसँगको विवादबीच सैन्य अभ्यास गरिरहेको ताइवानले भन्योः देश बचाउन कटिबद्ध छौं

पाँच दिने वार्षिक सैन्य अभ्यास शुक्रबार समाप्त हुँदैन। यसपटकको सैन्य अभ्यास चीनको खतरा मध्यनजर गर्दै सुरुवात गरिएको ताइवानका अधिकारीहरुले बताएका छन्।

बिहीबार पनि ताइवानले सैन्य अभ्यास गरिरहेको छ। आज ताइवानले हेलिकप्टर तथा फाइटर जेटबाट क्षेप्यास्त्र तथा बम समुन्द्रमा प्रहार गर्दै सैन्य अभ्यास गरेको छ।

सो क्रममा सैन्य अभ्यास अवलोकन गर्न पुगेकी ताइवानी राष्ट्रपति साइ इंग–वेनले आफूहरु देश बचाउन कटिबद्ध भएको बताइन्।

उनले भनिन्,‘देशको रक्षाका लागि हाम्रो दृढ संकल्प र प्रयासहरु हामी विश्वलाई देखाउन चाहन्छौं।’

पछिल्लो समय ताइवानले मुख्यक्षेत्र चीनको एक देश दुई प्रणाली नमान्ने बताइरहँदा चीनले ताइवानको हवाई क्षेत्रमा आफ्ना युद्धक विमानहरु अनुमति बिना उडाइरहेको छ।

ताइवानले आफू लोकतान्त्रिक मुलुक भएको बताउँछ तर चीनले ताइवानलाई आफ्नो मुलुकको अंगको रुपमा हेर्ने गरेको छ।

चीनले आवश्यक परेको खण्डमा आफूले शक्ति लगाएर ताइवान कब्जा पनि गर्नसक्ने बताइरहँदा ताइवानले चिनियाँ खतरासँग जुध्नलाई आफ्नो रक्षाशक्ति मजबुत बनाउन थालेको बताइएको छ।

गत मे महिनामा ताइवानकी राष्ट्रपति साइ इंग–वेनले आफ्नो नयाँ कार्यकालमा क्षेप्यास्त्र कार्यक्रम अगाडि बढाउने र प्रतिरक्षा प्रणालीलाई सशक्त बनाउने बताएकी थिइन्।

साउथ चाइना मर्निङ पोस्टका अनुसार चीनबाट खतरा महसुस हुन थालेपछि ताइवानले चीनसम्मै पुगेर मार हान्नसक्ने क्षेप्यास्त्रको विकास गर्ने अपेक्षा गरिएको छ।

ताइपेइस्थित नेसनल पोलिसी फाउन्डेसनका अनुसन्धानकर्ता चि चङका अनुसार ताइवान सरकारले यसवर्ष क्षेप्यास्त्र, ड्रोनहरुका साथै डिजिटल हतियार बिकास गर्नेछ।

केही समय अगाडि चीनका राष्ट्रपति सी चिनफिङले ताइवानका अलगाववादीबाट चीनलाई खतरा उत्पन्न भएकाले चिनियाँ जनमुक्ति सेनाले युद्धको तयारी थाल्नुपर्ने बताएका थिए।

यसबीचमा ताइवानमा पनि सैन्य अभ्यास गरिएको हो। एजेन्सी