युनिकोड
त्रिभुवन विश्वविद्यालयका उपकुलपतिसहित तीनै जना पदाधिकारीले सामूहिक राजीनामा दिएका छन्।
बिहीबार त्रिविका उपकुलपति प्राडा दीपक अर्याल, शिक्षाध्यक्ष प्राडा खड्ग केसी र रजिस्ट्रार प्राडा केदारप्रसाद रिजालले राजीनामा दिएका हुन्। तीनै जनाले राजीनामा दिएको शिक्षाध्यक्ष केसीले बताए।
सरकारले गरेको आह्वान गरेअनुसार नै आफूहरूले राजीनामा दिएको उनको भनाइ छ। ‘उपकुलपतिसहित हामी तीनै जनाले सामूहिक राजीनामा दिएका छौँ,’ केसीले नेपालखबरसँग भने।
प्रधानमन्त्रीसमक्ष राजीनामा पठाइसकेको उनले बताए। ‘हामीले राजीनामा बुझाइसक्यौँ, प्रधानमन्त्रीको कार्यालय पुग्दैहोला,’ केसीले भने।
नयाँ सरकारलाई काम गर्न सजिलो होस भनेर राजीनामा दिएको उनीहरूको भनाइ छ। सरकारले यसअघि भएका राजीतिक नियुक्ति हटाउने तयारी गरेको छ।
अर्याल २०८२ असार २५ मा उपकुलपति नियुक्त भएका थिए। उनलाई तत्कालनी प्रधानमन्त्री केपी शर्मा ओलीले उपकुलपति नियुक्त गरेका थिए। तत्कालीन कुलपति प्राडा केशरजंग बरालले राजीनामा दिएपछि ओलीले अर्याललाई उपकुलपति नियुक्त गरेका थिए।
त्यस्तै, शिक्षाध्यक्ष प्राडा केसी र रजिस्ट्रार प्राडा रिजाल २०८० चैत ३० मा नियुक्त भएका थिए। तत्कालीन उपकुलपति प्राडा बरालको सिफारिसमा उनीहरूलाई तत्कालीन प्रधानमन्त्री एवं त्रिविका कुलपति पुष्पकमल दाहाल ‘प्रचण्ड’ले नियुक्त गरेका थिए।
त्रिविका पदाधिकारीको कार्यकाल चार वर्षको हुन्छ। कार्यकाल बाँकी छँदै उनीहरूले राजीनामा दिएका हुन्।
प्रतिक्रिया