गगनको राजीनामा अस्वीकृत गर्न विश्वप्रकाशले राखेका सात तर्क

नेपाली कांग्रेसको केन्द्रीय कार्यसमितिको बैठकमा उसपभाति विश्वप्रकाश शर्माले सभापति गगन थापाको राजीनामा अस्वीकृत गर्ने प्रस्ताव पेश गरेका छन्। 

शुक्रबार कांग्रेस केन्द्रीय कार्यालय, सानेपामा बसेको केन्द्रीय कार्यसमिति बैठकमा थापाको राजीनामा अस्वीकृत गर्नुपर्ने धारणा राखेका थिए। त्यसका लागि उनले सात वटा तर्क पेश गरेका थिए। 

चुनावका लागि थापा नेतृत्वलाई समय अपूग भएको शर्माको भनाइ थियो। ‘राजनीतिमा हनिमुन पिरियड भन्ने गरिन्छ, खासगरी सरकारको नेतृत्व कसैले सम्हालेको शुरुवाती सय दिनलाई। त्यो वार्म अपको अवधिमा उसको कामको सकारात्मक या नकारात्मक संकेत बुझ्न सकिन्छ, तर सम्पूर्ण परिक्षण र समग्र समीक्षा गर्न सकिन्न,’ उनले भने। 

त्यसैले थापालाई पनि पराजयको भारी बोकाउन नहुने उनको जिकिर थियो। ‘विशेष महाधिवेशनबाट पार्टीको नयाँ नेतृत्व आएको ५० दिनको छोटो अवधिमा कसैले पनि दिग्विजयको परिणाम खोज्नु युक्तिसंगत र व्यक्तिप्रति न्याय हुन्न, अनि प्रतिकूलता चिरेर पार्टीलाई अनुकुलतामा पुऱ्याउने कमान्ड छोडेर सभापतिले पदत्याग गर्नु संगठनप्रति न्याय हुन्न,’ शर्माले भने। 

त्यसका बाबजुद नैतिक जिम्मेवारी अनुभूत गर्ने सभापतिको भावनालाई उच्च कदर गर्दै राजीनामा अस्वीकृत गर्ने निर्णय गर्नुपर्ने उनको भनाइ थियो। 

विश्वप्रकाश शर्माले पेश गरेका सात तर्क: 

१) नेपाली कांग्रेस निर्वाचनमा पहिलो दलका रूपमा विजयी बन्न सकेन। तर सन्तोष मान्नुपर्छ कांग्रेसले अपनाएको मुल नीतिको विजय भएको छ।

कांग्रेसले अंगिकार गरेको राजनीतिक र आर्थिक नीतिका पछिल्तिर पुराना/नयाँ सबै दल उभिन आइपुगेका छन्। वर्तमान संविधान, संसदीय प्रणाली, संघीयता र सामाजिक न्याय सहितको उदार अर्थब्यबस्था अबको नेपालमा सबैको साझा मुलमार्ग बन्न पुगेको छ।

२) नेपाली कांग्रेस प्रतिनिधि सभामा पहिलो दल बनेन, तर दोस्रो दल बनिरहँदा एक संयमित र जिम्मेवार राजनीतिक दल देशको संसद्ले जिम्मेवार प्रतिपक्षका रूपमा पाएको छ।

प्रतिपक्षी बेन्च जिम्मेवार ढंगले प्रस्तुत हुँदा त्यसले एकातर्फ लोकतान्त्रिक पद्धतिको सुदृढीकरणलाई बल पुग्छ, अर्कातर्फ समुन्नतिको गतिलाई सकारात्मक साथ पुग्नेछ। राम्रा कुरालाई साथ, खराबीमा खरो विमती कांग्रेसको रहनेछ।

३) पराजय हुँदा पनि देशभर पार्टीपंक्ति हल्लिएको छैन। दृढ ढंगले अघि बढेर नयाँ परिस्थितिको विकास गर्न सकिन्छ भन्ने उर्जा आम पार्टी सदस्यमा देखिएको छ। यो अत्यन्तै सकारात्मक छ।

४) विशेष महाधिवेशन मार्फत परिवर्तनको सन्देश लिएर नगएको भए, चुनावमा उर्जाका साथ खट्न सकिने थिएन र यो भन्दा खराब अवस्था आउने थियो।

अतः पराजय बेहोरेको भए पनि विशेष महाधिवेशनले नवीन रक्तसञ्चार गरेको थियो भन्नेमा देशभर आम पार्टी सदस्यको अव्यक्त मनोविज्ञान र व्यक्त धारणा पाइएको छ।

५) प्रतिकूल अवस्थाबीच चुनावमा जाँदा परिणाम अनुकूल नआउनु अनौठो होइन। तर परिवर्तनको सन्देशले पार्टी पंक्तिमा उर्जा भरेका कारण पार्टी शून्य परिणामको दुर्दशा र चरम निराशामा पुग्नबाट जोगिएको अभिमत पार्टीका शुभेच्छुक बौद्धिक क्षेत्रमा देखिएको छ।

पार्टीलाई नयाँ योजनाका साथ अघि बढाउन बौद्धिक क्षेत्रको यो समीक्षा र शुभभाव हाम्रो आगामी यात्राका लागि प्रेरक रहनेछ।

६) उसबेला विशेष महाधिवेशनसँग असहमत रहे पनि निर्वाचन पश्चात् अहिले त्यसभित्रको ठूलो पक्तिमा ‘पार्टी पछि फर्किनुहुन्न, अघि बढ्नुपर्छ, नियमित महाधिवेशनमा सबै सहभागी हुनुपर्छ र पार्टीलाई नवीन सम्भावनाको मार्गमा ऐक्यबद्ध भएर पुऱ्याउनुपर्छ’ भन्ने भावना प्रबल देखिएको छ। पार्टी सबैको साझा हो, यही अभिमत सबैको साझा अभिष्ट पनि हो।

७) वर्षौंदेखिको नागरिकको असन्तुष्टि फागुन २१ को निर्वाचनबाट हाम्रो विपक्षमा मतका रुपमा प्रकट भइसकेको छ। अब यो विगत बनिसक्यो। अब नयाँ ढंगले अघि बढेर, कांग्रेसले देशका लागि विगतमा गरेका सबै राम्रा काम शान्तसँग नागरिक पंक्तिमा पुऱ्याउन हामीलाई समय मिलेको छ। नयाँ परिस्थिति विकास गर्न नयाँ संकल्प र नयाँ विश्वासका साथ नवीन उर्जाले हामी अग्रसर हुनुछ।