युनिकोड
मध्यपूर्वमा बढ्दै गएको तनावलाई मध्यनजर गर्दै सरकारले सम्बन्धित देशका नेपाली दूतावासहरूलाई उच्च सतर्कतामा रहन र नागरिकको अवस्था निरन्तर अनुगमन गर्न निर्देशन दिएको छ।
आइतबार बसेको मन्त्रिपरिषद् बैठकले यस्तो निर्णय गरेको परराष्ट्रमन्त्री बालानन्द शर्माले जानकारी दिएका हुन्। उनकाअनुसार बैठकमा मन्त्रीहरूले खाडी मुलुकमा तनाव बढ्दा नेपालको विमानस्थलमा देखिएका समस्या समाधान भइसकेको ब्रिफिङ गरेका छन्।
उनले प्रभावित क्षेत्रका लागि आधिकारिक ट्राभल एडभाइजरी जारी गरिएको समेत जानकारी गराए। ट्रान्जिटमा परेका नेपाली कामदार तथा उपचारका लागि गएका बिरामीहरूलाई परेको असुविधा सम्बन्धित देशस्थित नेपाली राजदूतावासहरूसँग समन्वय गरी उनीहरूलाई गन्तव्यसम्म पुर्याउने व्यवस्था मिलाइएको समेत मन्त्री शर्माले जानकारी दिए।
उनले भने, ‘सम्बन्धित मुलुकमा गएर ट्रान्जिटमा परेका नेपाली कामदारहरू र प्यासेन्टहरूलाई भएको असुविधाबारे पनि छलफलहरु भए। उहाँहरूको सुविधाको लागि हरेक देशका राजदूतावासका राजदूतहरूसँग समन्वय गरेर गन्तव्यमा पुर्याउने तथा जान नसक्नेहरूलाई सम्बन्धित कम्पनीले नै रेखदेख गर्नेगरी समन्वय भइसकेको छ।’
उनले हालसम्म मध्यपूर्वमा रहेका नेपाली नागरिकमध्ये कसैको पनि हताहत नभएको र सुरक्षाका आवश्यक प्रबन्ध मिलाइसकिएको जानकारी गराए।
प्रतिक्रिया