युनिकोड
खाडी देशहरूमा बढ्दो सैन्य तनाव र त्यसले नेपाली श्रमिकमा पार्न सक्ने असरबारे छलफल गर्न प्रधानमन्त्री सुशीला कार्कीले मन्त्रिपरिषद्को आकस्मिक बैठक बोलाएकी छन्। प्रधानमन्त्रीले आजै साँझ बालुवाटारमा बैठक डाकेकी हुन्।
बैठकअघि प्रधानमन्त्री कार्कीले परराष्ट्रमन्त्री बालानन्द शर्मा र श्रम, रोजगार तथा सामाजिक सुरक्षा मन्त्री राजेन्द्रसिंह भण्डारीलाई बालुवाटार बोलाएर पछिल्लो वस्तुस्थितिबारे जानकारी लिइन्। भेटमा प्रधानमन्त्रीले युद्धग्रस्त क्षेत्रमा रहेका नेपालीहरूको सुरक्षा सुनिश्चित गर्न र आवश्यकता परेमा तत्काल उद्धारको कार्ययोजनातयार राख्न निर्देशन दिएकी थिइन्।
पछिल्लो समय इरान र इजरायलबीच बढ्दो तनावका कारण खाडी क्षेत्रका देशहरूमा सुरक्षा अवस्था गम्भीर मोडमा पुगेको छ। वैदेशिक रोजगारीका लागि सो क्षेत्रमा करिब १० लाखभन्दा बढी नेपाली कार्यरत रहेकाले त्यहाँको अस्थिरताले नेपालको रेमिट्यान्स अर्थतन्त्र र नागरिकको सुरक्षामा प्रत्यक्ष चुनौती थपेको छ।
यसअघि पनि सरकारले इजरायल-हमास युद्धका क्रममा २५० भन्दा बढी नेपालीहरूको स्वदेश फिर्ती गरेको थियो। आजको बैठकले मध्यपूर्वमा रहेका नेपालीहरूका लागि विशेष 'ट्राभल एडभाइजरी' जारी गर्ने सम्भावना छ।
प्रतिक्रिया