युनिकोड
राष्ट्रिय स्वतन्त्र पार्टी (रास्वपा)का बरिष्ठ नेता बालेन्द्र शाह (बालेन) आज नुवाकोट, धादिङ र गोरखा जिल्लाको चुनावी अभियानमा छन्।
उनको सचिवालयले आज बालेन तीन जिल्लामा जनसम्पर्क तथा घण्टी अभियानमा रहेको जनाएको हो।
नुवाकोटको छहरे, बिदुर र गल्छी, धादिङको गजुरी, मलेखु, धादिङबेँसी, सल्यानटार र आरुघाटमा आज बालेन जाँदैछन्। त्यसैगरि साँझ गोरखाको गोरखा बजारमा उनी पुग्ने चुनावी कार्यक्रम राखिएको बालेनको सचिवालयले जनाएको छ।
बालेन गएको बुधबार मधेश प्रदेशको रोड-शो समापन गरी राजधानी फर्किएका थिए।
उनले आज पहाडका जिल्लामा पनि मधेसमा गरेजस्तै रोडशो गर्न लागेका हुन्।
बालेन आफू उम्मेदवार रहेको झापा ५ का कार्यक्रम छाडेर अन्य जिल्लामा रास्वपाका उम्मेदवारलाई मत माग्दै हिँडिरहेका छन्। रास्वपाले बालेनलाई आगामी प्रधानमन्त्रीको रुपमा अघि सारेको छ।
आगामी फागुन २१ गते हुने प्रतिनिधिसभा निर्वाचनमा झापा ५ मा एमाले अध्यक्ष तथा पूर्वप्रधानमन्त्री केपी शर्मा ओलीसँग बालेनको कडा प्रतिस्पर्धा हुने अनुमान छ।
ओली र बालेन दुवैले यतिबेला आफूलाई भावी प्रधानमन्त्रीको रुपमा प्रस्तुत गरेर मतदाता रिझाउने प्रयास गरिरहेका छन्।
प्रतिक्रिया