युनिकोड
आगामी उपनिर्वाचनका लागि मकवानपुरका दुवै निर्वाचन क्षेत्रमा राष्ट्रिय स्वतन्त्र पार्टी (रास्वपा)ले उम्मेदवारी दर्ता गराएको छ। मंगलबार हेटौँडास्थित मुख्य निर्वाचन अधिकृतको कार्यालय र क्षेत्र नम्बर २ को निर्वाचन अधिकृतको कार्यालयमा पुगेर रास्वपाका उम्मेदवारहरूले मनोनयन पत्र दर्ता गराएका हुन्।
मकवानपुर क्षेत्र नम्बर १ मा रास्वपाका तर्फबाट प्रकाश गौतमले उम्मेदवारी दर्ता गराएका छन्। उनको प्रस्तावकमा टाकाराज थापा र समर्थकमा ध्रुव बहादुर विष्ट रहेका छन्। त्यस्तै, क्षेत्र नम्बर २ मा प्रशान्त उप्रेतीले मनोनयन दर्ता गराएका छन्। उप्रेतीको प्रस्तावकमा सञ्जीव पाठक र समर्थकमा शान्ति थापा विडारी रहेका छन्।
मकवानपुरको चुनावी विरासत मकवानपुरको निर्वाचन क्षेत्र नम्बर १ फरक–फरक राजनीतिक शक्तिहरूको प्रभाव क्षेत्र रहँदै आएको छ। यहाँ २०७९ को आम निर्वाचनमा राप्रपा र एमालेबीचको तालमेल तथा कांग्रेस नेतृत्वको गठबन्धनबीच तीव्र प्रतिस्पर्धा भएको थियो। त्यस्तै, क्षेत्र नम्बर २ मा नेकपा एमाले र एकीकृत समाजवादीको बलियो पकड रहँदै आएको छ। विगतमा पुराना दलहरूको वर्चस्व रहेको यस जिल्लामा गत निर्वाचनमा रास्वपाले सम्मानजनक मत प्राप्त गरेको थियो।
रास्वपाले सुशासन र भ्रष्टाचार नियन्त्रणलाई मुख्य चुनावी एजेन्डा बनाएको छ। गौतम र उप्रेती दुवैले स्थानीय स्तरमा लोकप्रिय र युवा उम्मेदवारका रूपमा आफूलाई प्रस्तुत गरेका छन्। मनोनयन दर्तापछि रास्वपाका कार्यकर्ताहरूले चुनावी गीत र नारासहित हेटौँडा बजारमा र्याली निकालेका थिए।
प्रतिक्रिया