युनिकोड
भिजिट भिसा प्रकरणमा उच्चस्तरीय छानबिन समिति बनाउने सरकारको निर्णयलाई प्रमुख प्रतिपक्षी माओवादी केन्द्रले स्वागत गरेको छ।
माओवादी केन्द्रका सांसद वर्षमान पुनले मंगलबार प्रतिनिधिसभाको बैठकमा बोल्दै आफूहरुसँग भएको सहमति अनुसार समिति बनाएको भन्दै सरकारलाई धन्यवाद समेत दिए।
‘जेठ २ गते भएको सहमति अनुसार सरकारले हिजै मात्र उच्चस्तरीय अध्ययन तथा छानबिन समिति गठन गरेको छ,’ पुनले भने, ‘जसको जानकारी माननीय गृहमन्त्रीले सम्मानित सदनमा प्रस्तुत गर्नु भएकोछ। म सरकारलाई छानबिनको लागि, अध्ययनका लागि उच्चस्तरीय छानबिन समिति जुन बनाएको छ, म त्यसका निम्ति सरकारलाई धन्यवाद व्यक्त गर्दछु।’
उनले समितिले तथ्यगंतरुपमा छानबिन नगरे जनताले नै आलोचना गर्ने समेत बताए। ‘तथ्यसंगत ठंगले छानबिन भएन, यसमा अविश्वास भयो भने निश्य पनि सार्वजनिकरुपले जनताले निगारनी गरिराख्नेछ,’ पुनले भने, ‘आलोचना हुन्छ। खण्डन हुनेछ।’
आफहरु स्वयं पनि यसमा निगरानी र खबरदारी गर्ने भन्दै टीओआर अनुसार काम गर्न समितिलाई शुभकामना समेत उनले दिए।
‘हामी स्वयं प्रमुख प्रतिपक्षको तर्फबाट पनि हामी निगरानी गरिराख्नेछौँ, खबरदारी गरिराख्ने छौँ,’ पुनले भने, ‘अहिलेलाई चाहिँ हामी यो उच्चस्तरीय छानबिन समितिले आफ्नो टीओआर अनुसार आफ्नो काम सम्पन्न गरोस् हाम्रो शुभेच्छा छ।’
प्रतिक्रिया