टरिगाउँ विमानस्थल बनाउन ओली, देउवा र प्रचण्डले आश्वासन मात्रै दिएको भन्दै सांसद गिरीको आक्रोश

नेपाली कांग्रेसका सांसद दीपक गिरीले दाङको विमानस्थल विस्तारका लागि नेताहरुले आश्वासन मात्रै दिएको भन्दै आक्रोश पोखेका छन्।

मंगलबार प्रतिधिसभाको बैठकमा बोल्दै उनले देशकै पुरानो विमानस्थल भए पनि अहिले थकित मुद्रामा रहेको उल्लेख गरे। ‘टरिगाउँ एयरपोर्ट जसको इतिहास लामो छ,२०११ सालमा सुरु भएको एरपोर्टले जनतालाई धेरै सहयोग गर्‍यो,’ गिरीले भने, ‘सबैलाई सेवा गरेको एयरपोर्ट आज थकित मुद्रामा छ।’

हरेक बजेट भाषणमा विमानस्थल बनाउने कुरा आए पनि बजेट भने नआउने गरेको उनको आरोप छ। ‘प्रकाशरण महत अर्थमन्त्री हुँदा, वर्षमान अर्थमन्त्री हुँदा र अहिले विष्णु पौडेल अर्थमन्त्री हुनुहुन्छ,’ सांसद गिरीले भने, ‘सधै दाङको टरिगाउँ एरपोर्ट यो सरकारले बनाउँछ, बन्नेछ भनेर बजेट भाषणमा प्रस्तुत हुन्छ। तर, टरिगाउँ एरपोर्ट सधै त्यस्तै थकित छ।’

विमानस्थलको धानमार्ग अहिले ७५० मिटर मात्रै रहेको र त्यसलाई विस्तार गर्न ३ अर्ब ४२ करोड चाहिने भन्दै त्यो यसपालीको बजेटमा बिनियोजन गर्न समेत उनले माग गरे। ‘७५० मिटर लामो धावन मार्ग छ, जसलाई १५०० चहिएको छ,’ गिरीले भने, ‘मैले यो सदनलाई देखाउन यो डीपीआर पनि बोकेर आएको छ। त्यसका लागि ३ अर्ब ४२ करोड चाहिन्छ। त्यो बिनियोजन हुनुपर्‍यो।’