युनिकोड
नेपाली कांग्रेसका सभापति शेरबहादुर देउवाले विदेशमा सिकेका ज्ञान र सीपलाई स्वदेशमा प्रयोग गरी देश विकासमा योगदान गर्न प्रवासी नेपालीहरुलाई आग्रह गरेका छन्।
नेपाली कांग्रेसको जनसम्पर्क विभागले बिहीबार पार्टी केन्द्रीय कार्यालयमा आयोजना गरेको कार्यक्रममा बोल्दै उनले यस्तो आग्रह गरेका हुन्। उनले मुलुक बाहिर रहेर पनि देश र जनताको चासो राखेको भन्दै विभिन्न कामको सिलसिलामा विदेशमा रहेका नेपालीहरुरूको प्रशंसा गरे।
उनले विश्वको जुनसुकै कुनामा रहेपनि नेपालीहरूप्रति सम्मान हुने वातावरण सिर्जना गर्नुपर्ने बताए। उनले विदेशमा रहेका नेपालीलाई नेपालको वा सम्बन्धित देशको कानुनले पारेको समस्याका बारेमा नयाँ कानून बनाएर समाधान गर्न प्रयास गर्ने बताए।
उनले भने, ‘तपाईंहरुले विदेशमा हासिल गरेको ज्ञान सीप, अनुभव र पुँजीलाई स्वदेशमा लगाएर देशको तिब्र आर्थिक र सामाजिक विकास गराउन के ककस्ता नीतिगत परिवर्तन गर्नुपर्छे। हामीलाई निर्धक्क भन्नुहोस् हामी राष्ट्रिय सहमति गराएरै पारित गराउँछौँ। विदेशमा रहेका नेपालीलाई सक्रिय बनाएर आइपरेका समस्या समाधान गर्ने प्रवासमा रहेका नेपालीहरुरूलाई अध्ययन रोजगारीमा रहेकालाई सघाउने राज्यका निकायहरूलाई परिचालन गराउने सबै क्रियाशील रहनेछु।’
सभापति देउवाले विदेशमा रहेर नेपाली कांग्रेससँग आवद्ध नेपालीहरूलाई पार्टीको महाधिवेशन लगायतका कार्यक्रमहरूमा प्रतिनिधित्व गराएको बताए। अमेरिका तथा भारतमा रहेका प्रवासी नेपालीलाई पार्टीको केन्द्रीय सदस्यमा प्रतिनिधित्व गराएको भन्दै युरोपलगायत कतिपय छुटेका देशबाट पनि पार्टीमा प्रतिनिधित्व गराउने उनको भनाइ छ।
उनले भने, ‘तपाईंहरूलाई पार्टीको गतिविधिमा समान रुपलले प्रतिनिधित्व गराउँदै लैजाने अभिप्रायले जनसम्पर्क समितिको गठनलाई उत्तिकै महत्व दिएका छौँ जति देशमा पार्टी संगठनको निर्माणमा दिएका छौँ। पार्टीको महाधिवेशन, महासमितिमा प्रतिनिधित्वको अलावा, समान नागरिक अधिकार दिने प्रयास गरिरहेका छौँ।’
पूर्वप्रधानमन्त्रीसमेत रहेका सभापति देउवाले संघीय लोकतान्त्रिक गणतन्त्रको रक्षका लागि विदेशमा रहेका शिक्षित नेपाली नागरिकले सहयोग गर्नुपर्ने बताए।
प्रतिक्रिया