युनिकोड
राष्ट्रिय स्वतन्त्र पार्टी (रास्वपा)का कार्यवाहक सभापति डोलप्रसाद अर्यालले कांग्रेस-एमाले मिल्दा देशको अवस्था झन् बिग्रिएको टिप्पणी गरेका छन्। शुक्रबार प्रतिनिधिसभाको बैठकलाई सम्बोधन गर्दै अर्यालले दुई दल मिल्दा सुशासन कायम र भ्रष्टाचार अन्त्यको कल्पना गर्न नसक्ने अवस्थामा पुगेको बताएका हुन्।
उनले भने, 'ती दल मिल्दा त बिग्रिँदो रहेछ। सुशानसन कायम र भ्रष्टाचार अन्त्यको त कल्पनै गर्न नसकिने अवस्थामा पुग्यो।'
अर्यालले पूर्वराजा ज्ञानेन्द्र शाहलाई लक्षित गर्दै संवैधानिक व्यवस्थाबाहिर गएर जबर्जस्ती गरे देश द्वन्द्वमा धकेलिने बताए।
'हाम्रो संविधानले कसैको आगमन र बहिर्गमनका लागि वैधानिक बाटो निर्दिष्ट गरेको छ। त्यसको प्रयोग गरेर जनमतमार्फत जो पनि शासनमा आऊजाऊ गर्न सक्छन्,' उनले भने, 'योभन्दा अर्को बाटो कसैले सोचेको छ र त्यसमा जबरजस्तीको प्रयास भयो भने फेरि मुलुक द्वन्द्वतर्फ उन्मुख हुनेमा हामी सबैले ख्याल गर्नुपर्छ।'
उनले अहिलेको मुख्य एजेन्डा रूपान्तरणका बाधकहरूको अन्त्य भएको सुनाए। 'अहिलेको मूल एजेन्डा रूपान्तरणका बाधक, परिवर्तनका अवरोधक र विकृतिका कारकहरूको अन्त्य हो। सुधारको सुरुवात संविधान सच्याएर गर्नुपर्छ,' उनले भने।
उनले संविधान संशोधनबारे सरकारले विपक्षीसँग संवाद नै नगरेको गुनासो पनि गरे। अर्यालले गर्भनर नियुक्ति, शिक्षकको आन्दोलन र शिक्षामन्त्रीको राजीनामाले सरकारले लाज ढाक्ने नसकेको टिप्पणी गरे।
प्रतिक्रिया