युनिकोड
राष्ट्रियसभामा नेपाली कांग्रेसकी सांसद कमला पन्तले राज्यको विभिन्न निकायमा महिलाको सहभागिता उल्लेख वृद्धि भएको बताएकी छन्।
आइतबार रष्ट्रियसभाको विशेष समयमा बोल्दै उनले स्थानीय तह सरकारमा महिलाको सहभागिता सबैभन्दा बढी ४१ प्रतिशत पुगेको बताएकी हुन्।
उनले सहभागिताको हिसावले महिलाको संख्या वृद्धि भएको देखाए पनि अर्थपूर्ण सहभागितामा धेरै कमजोरी रहेको बताइन्। महिला तथा बालबालिकाको क्षेत्रमा राज्यले गरेको कतिपय प्रतिवद्धता नारामा सीमित भएको उनको भनाइ छ।
‘महिला र बालबालिका भनेपछि एकआपसमा अन्तरसम्बन्ध छ भन्ने हाम्रो मान्यता पनि हो र वास्तविकता पनि त्यही हो। तर केही समययता केही कुरा नारामा सीमित भएका छन्। अब प्रोग्रेसिभ हुँदै जानुपर्नेमा हाम्रा केही ठाउँमा हामीले गरेका प्रतिवद्धता लागू भएका छन्। सहभागिताका हिसावले वृद्धि भएको छ,' उनले भनिन्, 'तर अर्थ पूर्ण सहभागितामा कमजोरी छ। महिलाहरूको अबको मुद्दा भनेको अर्थपूर्ण सहभागिता हुनु पर्यो। केही छिद्र भेट्टाउने बित्तिकै महिलाहरूलाई बाइपास गर्ने कमजोर बनाउने पछि पार्ने परिपाटी अहिले पनि छँदैछ। यसमा सकारात्मक पक्ष भन्दा संघीय संसदमा ३४ प्रतिशत प्रदेशसभामा ३६ दशमवल ५ प्रतिशत स्थानीय तहका ४१ दशमलव १ प्रतिशत र निजामति सेवामा केही वर्ष अघि चार प्रतिशत रहेकोमा अहिले २८ प्रतिशत पुगेको छ। यसमा थप उदार हुनुपर्ने अवस्था छ।’
पन्तले महिला भएकै कारणले महिलाले असमानता व्यहोर्नुपरेको बताइन्। छोरी र छोराको बीचमा विभेद्को अन्त्य गराउन बलियो कानुन आवश्यक भएको उनको भनाइ छ।
प्रतिक्रिया