विद्यार्थी संगठनले गरेको पुस्तान्तरणले ४० लाख मतदाताको मनोविज्ञानलाई समेट्नेछ : शर्मा

प्रमुख प्रतिपक्षी नेकपा माओवादी केन्द्रका उपमहासचिव जनार्दन शर्माले आफ्नो पार्टी निकट विद्यार्थी संगठनले गरेको पुस्तान्तरणलाई ऐतिहासिक कदम भन्दै त्यसले ४० लाख मतदाताको मनोविज्ञानलाई समेट्ने टिप्पणी गरेका छन्। 

माओवादी निकट विद्यार्थी संगठन अखिल क्रान्तिकारीमा ३२ वर्षे उमेरहद लगाउनुपर्ने पक्षले चुनाव जितेपछि समाजिक संजाल फेसबुकमा लेखेका छन्, ‘विद्यार्थी संगठनले गरेको पुस्तान्तरण ऐतिहासिक र क्रान्तिकारी कदम हो। यसले झण्डै चालीस लाख मतदाताको मनोविज्ञानलाई समेट्नेछ।’

माओवादीभित्र नेतृत्व हस्तान्तरणमा जोड दिइरहेका शर्माले एजेन्डा सहित पार्टी निर्माण गर्दै नयाँ पुस्तामा हस्तान्तरण गर्ने आफ्नो एक मात्र उद्देश्य रहेको उल्लेख गरेका छन्।

‘पार्टी निर्माण गर्ने बाटो आफै जोखिमपूर्ण छ, तर  इमानदार प्रयत्न, विधि पद्धति र विचारको स्पष्टतासहित लागेमा यो संभव छ,’ उनले लेखेका छन्, ‘पार्टी  सुधारको लागि गरिने प्रयत्न न फुट- विभाजनको लागि हो, न त सत्ता प्राप्तिको लागि।’

शर्माले अघि लेखेका छन्, ‘बरु इमानदारी साथ भन्न चाहन्छु, म नियमित राजकीय जिम्मेवारीमा गएर पार्टी निर्माण गर्ने कार्य कमजोर बनाउने छैन। एजेन्डासहित पार्टी निर्माण गर्दै सक्षम र सुदृढ पार्टी नयाँ पुस्तामा हस्तान्तरण एक मात्र उद्देश्य हो।'