उपसभामुख भन्छिन्– ट्रान्स हिमालयन प्लेटफर्मको कार्यान्वयनलाई तीव्रता दिनुपर्छ

उपसभामुख इन्दिरा रानाले ट्रान्स हिमालयन प्लेटफर्मको कार्यान्वयनलाई तीव्रता दिन आवश्यक रहेको बताएकी छिन्। 

चीनको तिब्बतमा आयोजित चौथो चाइना सिजाङ ट्रान्स हिमालयन फोरममा बिहीबार सम्बोधन गर्दै उपसभामुख रानाले चीन र नेपाल, दक्षिण एसिया, दक्षिण पूर्वएसिया र मध्यएसियाका अन्य देशहरूबीचको सम्पर्क विस्तारका लागि ट्रान्स हिमालयन प्लेटफर्मको कार्यान्वयनलाई तीव्रता दिन आवश्यक रहेको बताइन्। 

उनले फोरम ट्रान्स हिमालयन राष्ट्रहरूलाई उनीहरूको साझा समृद्धि र विकासको लागि एकसाथ ल्याउन चीनको अत्यन्त महत्वपूर्ण प्रयास भएको चर्चा गर्दै हिमालय क्षेत्रका देशहरुका बीचमा कनेक्टिभिटी बढाउन, प्रकृतिमैत्री दिगो विकासलाई प्रवर्द्धन गर्न र आपसी सहयोग विकास गर्न महत्वपूर्ण संस्थागत प्लेटफर्म बन्ने विश्वास व्यक्त गरिन्।  

‘ट्रान्स हिमालयन फोरमले यस क्षेत्रका देशहरूका बीचमा थप सहकार्यका लागि मार्ग प्रशस्त गर्नका लागि व्यापक सम्भावना र अवसरहरू प्रदान गर्नेछ’, उनले भनिन्, ‘यो फोरमले बीआरआईलाई मात्र नभई देशहरूबीचको व्यापार, पारवहन र लगानीलगायतका सामाजिक–आर्थिक सहकार्यलाई पनि प्रवद्र्धन गर्नेछ।’ 

ट्रान्स हिमालयन रेलवे, राजमार्ग, हाई भोल्टेज पावर ग्रिडहरू लगायतका ठूला परियोजनाहरूलाई कार्यान्वयनको आवश्यकता औल्याउँदै उनले यस्ता पूर्वाधारहरू हिमालयन क्षेत्र र देशहरूलाई आपसमा जोड्न अत्यन्तै लाभदायक हुने बताइन्।