राजनीति


इलाम २ मा माओवादीले एमालेलाई सघाउने, शर्मा भन्छन् : सुहाङलाई जिताउन जुट्यौँ

इलाम २ मा माओवादीले एमालेलाई सघाउने, शर्मा भन्छन् : सुहाङलाई जिताउन जुट्यौँ

फाइल तस्बिर


नेपालखबर
चैत २२, २०८० बिहिबार १२:१६, काठमाडौँ

आगामी वैशाख १५ गते इलाम क्षेत्र नं. २ मा  हुने उपनिर्वाचनमा सत्तारुढ नेकपा माओवादी केन्द्रले नेकपा एमालेलाई सघाउने भएको छ।

नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहालबीच भएको सहमतिअनुसार इलाम २ मा सुहाङ नेम्वाङ दुई दलका साझा उम्मेदवार हुने निश्चित भएको छ।

इलामबाट उम्मेदवारका रुपमा एकल सिफारिस भएका नेता धिरेन्द्र शर्मा रमणले एमालेलाई सघाउने निर्णय भएको बताए।

‘हामीले केन्द्रको सहमतिअनुसार यहाँ एमालेका सुहाङ नेम्वाङलाई सघाउने भएका छौँ’, शर्माले नेपालखबरसँग भने, ‘हामी यहाँ एमालेका उम्मेदवारलाई साझा बनाएर जिताउन जुटिसकेका छौँ।’

शर्माका अनुसार माओवादीले इलाम २ छाडेर बझाङ १ को प्रदेश सभा १ लिने सहमति केन्द्रमा भएको बताए। बझाङमा कांग्रेसका प्रदेश सांसद पृथ्वीबहादुर सिंहको गत असार ५ गते दुर्घटनामा निधन भएपछि उपनिर्वाचन हुँदैछ।

माओवादी केन्द्र इलामले धिरेन्द्र शर्माको नाम एकल रुपमा उम्मेदवारका लागि सिफारिस गरेको थियो। शर्माको नाम सिफारिस भएपछि माओवादीले चुनावी तयारी पनि थालेको थियो। तर अब माओवादीको सबै शक्ति सुहाङलाई जिताउन लाग्ने शर्माले बताए। 

इलाम २ मा माओवादीले २०७९ को प्रतिनिधिसभा तथा प्रदेशसभा निर्वाचनका क्रममा मानुपातिक तर्फ ५ हजार १ सय ५३ मत ल्याएको थियो।

यो क्षेत्रमा २०७९ को निर्वाचन जितेका नेकपा एमालेका उपाध्यक्ष सुवास नेम्वाङको गत भदौ २५ गते निधन भएको थियो। त्यसपछि एमालेले यहाँको उपनिर्वाचनका लागि उनका पुत्र सुहाङलाई मैदानमा उतारेको छ। उपनिर्वाचनका लागि निर्वाचन आयोगले आगामी चैत २४ गते उम्मेदवारी दर्ताको तोकेको छ।

प्रतिक्रिया

नेपाल खबर प्रा.लि
सूचना विभाग दर्ता नंः ५४९/०७४-७५

Nepal Khabar Pvt. Ltd.

Blue Star Complex
Thapathali-11, Kathmandu, Nepal
+977 01 5340505 / 5341389
Admin:[email protected]
News:[email protected]

विज्ञापनका लागि सम्पर्क


+977 9851081116
[email protected]
Copyright © 2021 Nepalkhabar. All Rights Reserved. Designed byCurves n' Colors. Powered by .