युनिकोड
माओवादी केन्द्रका केन्द्रीय सदस्य दुर्गाप्रसाद चापागाईंले कोशी प्रदेशमा सहमतीय सरकार बनाउनुपर्नेमा जोड दिएका छन्।
कोशी प्रदेशसभा सदस्यसमेत रहेका चापागाईंले सामाजिक सञ्जालमार्फत् कार्की नेतृत्वको सरकारलाई नै प्रदेश सहमतिको सरकारमा रुपान्तरण गर्नुपर्ने र सबै दललाई सरकारमा समेट्नुपर्ने बताएका हुन्।
‘संघीय गठबन्धनमा रहेका दललाई कोशीका सरकारमा ल्याए बाहिरिने एमालेको चेतावनी र एमालेलाई बाहिरै राखेर गठबन्धन दलले मात्र सरकार चलाउँने दुबै सोच प्रदेशको स्थायित्वका लागि उचित छैन,’ चापागाईंले सामाजिक सञ्जालमा लेखेका छन, ‘एमालेले गठबन्धन दललाई सहभागी गराए सरकार छोड्छौं भन्ने अडान त्याग्नुपर्छ। गठबन्धनका दलले पनि एमालेलाई सरकारबाट बाहिर निकालेर पुनः गठबन्धनको मात्र सरकार बाउनुपर्छ भन्नु हुँदैन।’
कोशी प्रदेशलाई स्थायित्व दिन पनि सर्वदलिय सहमतिमा सरकार सञ्चालन गर्नुपर्नेमा उनको जोड छ। ‘हाम्रो प्रदेशको गणितीय जटिलतालाई ध्यान दिँदै प्रदेश सहमतिको सरकार निर्माणमा सबैपक्ष इमान्दारपूर्वक लागौं,’ चापागाईंले भनेका छन्।
एमालेले आफ्नो समर्थनमा मुख्यमन्त्री बनेकाले सत्ता गठबन्धन दललाई सरकारमा नल्याउन कार्कीमाथि दबाब दिइरहेको छ। काँग्रेसले भने गठबन्धनमा सहभागी दलहरुलाई सरकारमा सहभागी गराउन कार्कीलाई निर्देशन दिइसकेको छ।
प्रतिक्रिया