संविधान सभाका अध्यक्ष एवं नेकपा एमालेका उपाध्यक्ष सुवास नेम्वाङ सोमबार राति बालुवाटारस्थित निवासमै सुतिरहेका थिए।
मध्यरातितिर उनी शौचालय गए। तर परिवारका सदस्यले उनलाई राति १ बजेतिर शौचालयमै लडेको अवस्थामा भेट्टाए। उनी बेहोस थिए।
त्यसपछि हतार हतार उनलाई महाराजगन्जस्थित त्रिवि शिक्षण अस्पताल पुर्याइयो।
‘तर त्यहाँ पुग्दासम्म लभगभ उहाँको मृत्यु भइसकेको थियो’, एमाले स्थायी कमिटी सदस्य शेरबहादुर तामाङले नेपालखबरसँग भने, ‘पारिवारिक स्रोतका अनुसार चिकित्सकले उनलाई हर्टअट्याक (हृदयाघात) भएको भने र, लगत्तै मृत घोषणा गरे।’
एमाले नेता तामाङका अनुसार नेम्वाङलाई मृत घोषणा गर्दा रातको त्यस्तै साढे १ वा २ बजेको थियो।
तामाङले पारिवारिक स्रोतलाई उधृत गर्दै बताएअनुसार आइतबार धरान पुगेर फर्किएका नेम्वाङलाई सोमबार बिहानैदेखि ज्वरो आएको थियो।
ज्वरो निकै आएपछि उनी सोमबार दिनभर घरमै आराम गरेर बसेका थिए। त्यसपछि त्यही दिन राति १ बजे उनी शौचालयमा बेहोस भेटिएका थिए। त्यसपछि उपचारका लागि त्रिवि अस्पताल पुर्याउनासाथ चिकित्कसले उनलाई मृत घोषणा गरे।
Shares
प्रतिक्रिया