युनिकोड
सत्तारुढ नेकपा माओवादी केन्द्रको पदाधिकारी बैठक पार्टीको केन्द्रीय कार्यालय (पेरिसडाँडा) मा सुरु भएको छ।
माओवादीले तेह्र महिनापछि आज केन्द्रीय समितिको बैठक राख्दै छ। त्यसअघि पदाधिकारी बैठक बसेको हो।
काठमाडौंस्थित प्रज्ञा भवनमा बिहान ११ बजे सुरु हुने केन्द्रीय समितिको बैठकका एजेन्डाबारे छलफल गर्न पेरिसडाँडामा पदाधिकारी बैठक बसिरहेको हो।
केन्द्रीय समिति बैठकको सुरुमा महासचिव देव गुरुङले एजेन्डा प्रस्तुत गर्नेछन्। त्यसपछि अध्यक्ष पुष्पकमल दाहाल प्रचण्डले राजनीतिक प्रतिवेदन पेस गर्ने कार्यतालिका छ।
केन्द्रीय समिति बैठकका लागि गत सोमबार बसेको माओवादी पदाधिकारी बैठकले केही एजेन्डा तय गरिसकेको छ।
जसअनुसार नेताहरूको जिम्मेवारी बाँडफाँट, संगठन विस्तारका लागि तीन महिने अभियान घोषणा, विशेष महाधिवेशन र विधान महाधिवेशन तथा समसामयिक विषयअन्तर्गत सरकार, सदनलगायत एजेन्डा छन्।
बैठकमा ३८५ जना केन्द्रीय सदस्य, १९८ वैकल्पिक केन्द्रीय सदस्य, प्रदेश समितिका १०० जना पदाधिकारी तथा निर्वाचन आयोग, अनुशासन आयोग र लेखा आयोगका ७५ जना गरी ७ सय ५८ जनाले भाग लिने माओवादी केन्द्रले जनाएको छ।
माओवादी केन्द्रको केन्द्रीय समितिको बैठक १३ महिनापछि आज बस्न लागेको हो।
यसअघि २०७८ पुसमा भएको महाधिवेशनपछि २०७९ असारमा पहिलोपटक माओवादी केन्द्रको केन्द्रीय समितिको बैठक बसेको थियो। जसले पार्टी महासचिवमा देव गुरुङलाई चयन गरेको थियो।
प्रतिक्रिया