युनिकोड
पार्टी सभापति शेरबहादुर देउवाले सहमतिबिनै पार्टी विभागको संख्या बढाउने प्रस्ताव ल्याएपछि नेपाली कांग्रेसका वरिष्ठ नेता रामचन्द्र पौडेल समूहले केन्द्रीय कार्यसमिति बैठक बहिस्कार गरेको छ।
बिहीबार दिउँसो १ बजे बैठक सुरु भएपछि केन्द्रीय सदस्यलाई वितरण गरिएको नौ बुँदे प्रस्तावमाथि छलफल गरिने उल्लेख थियो। जसको बुँदा नम्बर ७ मा रहेको केन्द्रीय विभागहरुको संरचनात्मक र संख्यात्मक परिमार्जनसम्बन्धी प्रस्तावमाथि पौडेल समूहले आपत्ति जनाएर बैठक बहिस्कार गरेको हो।
कांग्रेसको अहिले २८ वटा विभाग रहेकोमा त्यसलाई बढाएर सभापति देउवाले ४५ वटा बनाउने तयारी गरेपछि पौडेल, पूर्वमहामन्त्री कृष्ण सिटौला र महामन्त्री शशांक कोइराला समूहले बैठक बहिस्कार गरेका हुन्।
कांग्रेसका एक केन्द्रीय सदस्यका अनुसार उक्त एजेन्डाबारे सुइँको पाएर पौडेल, सिटौला र कोइराला समूहका नेताहरु बैठकमै गएका थिएनन्। बैठकमा पुगेका केन्द्रीय सदस्य महेश आचार्यपनि आफ्नो असहमति राखेर बाहिरिएका थिए।
भातृ संस्थाको अधिवेशन ६ महिनामा सुनिश्चित गर्न नसकेको, पार्टी महाधिवेशनको कार्ययोजना नल्याएको भन्दै पौडेल र सिटौला पक्षले सभापति देउवाको आलोचना गर्दै आएका थिए।
सभापति देउवा पक्षले कार्यसमिति बैठकमा पेश गर्ने एजेन्डाबारेमा धारणा बनाउन पौडेल, सिटौला र कोइराला समूहको भेला महामन्त्री शशांक कोइराला निवास धुम्बाराहीमा बुधबार बसेको थियो।
यो पनिः
विभागमा पदाधिकारी नियुक्तिस् ४५ महिनापछि ताते देउवा, पौडेलसमूह रणनीति बनाउँदै
प्रतिक्रिया