सीमा विवाद चर्किरहेको बेला नेपाल-भारत सीमा सुरक्षा बैठक पोखरामा सुरु भएको छ। बैठक सीमा सुरक्षाको बारे छलफल भएको सशस्त्र प्रहरीका प्रवक्ता डिआइजी सुरजकुमार श्रेष्ठले बताए।
तर बैठकमा सीमा मिचिएको विषयले प्रवेश नै पाएन। डिआइजी श्रेष्ठका अनुसार पोखरामा भएको यो नियमित बैठकमा सीमामा हुने अपराध नियन्त्रण, विशेष अवस्थामा हुने काम कारवाहीमा समन्वय र पेशागत तालीमबारे छलफल भयो।
‘तीनदिने बैठकमा सूचना आदान–प्रदान, खुला सीमानाका कारण हुने आपराधिक गतिविधी नियन्त्रण गर्ने विषयमा छलफल भयो’, उनले भने,‘ खुला सीमाना हुँदा नेपालमा अपराध गरेर भारत पस्ने र भारतमा अपराध गर्नेहरु नेपाल पस्ने गरेको अवस्थामा आपराधिक क्रियाकलाप नियन्त्रण गर्न र सूचना आदानप्रदान प्रभावकारी बनाउने भन्ने कुरा भयो।’
बैठकमा भारतको तर्फबाट सीमा सुरक्षा बल (एसएसबी) का डिजीको नेतृत्वमा ६ जना सहभागी छन् भने नेपालको तर्फबाट सशस्त्र प्रहरीका आइजी शैलेन्द्र खनालको नेतृृत्वमा गृह, परराष्ट्र, नेपाल प्रहरी र राष्ट्रिय अनुसन्धानका पदाधिकारी सहभागी छन्।
सीमा सुरक्षा बैठक हरेक वर्ष आयोजना गर्ने प्रावधान छ। नेपाल–भारत सीमा सुरक्षा बैठक नियमित हुन सकिरहेको छैन। ०६९ सालयता जम्मा तीनपटक मात्रै नेपाल–भारत सीमा सुरक्षा बैठक बसेको छ।
२०६९ सालमा भारतमा पहिलो बैठक बसेको थियो। त्यसपछि दोस्रो बैठक ०७२ सालमा नेपालमा बसेको थियो। २०७३ साल साउन अन्तिम साता भारतको नयाँदिल्लीमा तेस्रो बैठक बसेको थियो। बैठकमा चाडपर्वको बेलामा नागरिकको सुरक्षाको बारेमा पनि छलफल भएको डिआइजी श्रेष्ठले बताए।
प्रतिक्रिया