तीन बालिकालाई सँगै राखेर एयरपोर्टको गेस्ट हाउसमा अमेरिकी नागरिककाे याैन लिला

प्रहरीको केन्द्रीय अनुसन्धान ब्युरो (सिआइबी) लाई सूचना थियो– अमेरिकी नागरिक जासन लियोड मुडी केही बालक लिएर होटेलमा जान्छन्, उनी बाल यौनदुराचारी हुन सक्छन् ।

यही सूचनाका आधारमा सिआइबी टोली आइतबार साँझ एयरपोर्टस्थित मेमोरियल गेस्टहाउसको १०४ नम्बर कोठामा पुग्यो ।

प्रहरी पुग्दा जासन आपत्तिजनक अवस्थामा भेटिए । तर, उनको कोठामा बालक होइन, तीन बालिका थिए । यो खबर आजको नयाँ पत्रिका दैनिकमा नवराज मैनालीले लेखेका छन्।

आर्थिक अवस्था कमजोर भएका तीन बालिकालाई पैसाको लोभमा उनले होटेलमा लगेर अर्धनग्न बनाई दुराचार गरेको खुल्यो । एक बालिकालाई बलात्कार गरेर र अन्य दुईलाई बलात्कार प्रयास गरेको प्रहरीले जनाएको छ । यसअघि चार बालकमाथि पनि यौनदुराचार गरेका थिए ।

खासगरी सिनामंगल क्षेत्रको सुकुम्बासी बस्तीका बालबालिकालाई खेलकुद सामग्री, खानेकुरा र पैसा दिएर उनले नजिक्याएका थिए । बालबालिका नजिकिएपछि होटेलमा लैजाने गरेको प्रहरीले जनाएको छ ।

सातै बालबालिकाले जासनविरुद्ध जाहेरी दिएको सिआइबीका एसपी बेलबहादुर पाण्डेले बताए । उनीबाट अरू पनि पीडित हुन सक्ने प्रहरी आशंका छ । उनीविरुद्ध तीन बलात्कार तथा चार बाल यौनदुराचारसम्बन्धी मुद्दा चलाउने प्रहरीले जनाएको छ ।

४० वर्षीय जासन सन् २०१४ देखि नै नेपाल आउने गरेका थिए । २०१६ मा नेपाल आउँदा चार महिना बसेका थिए । त्यस्तै, २०१७ मा पनि चार महिना बसेका थिए । पछिल्लोपटक अगस्टमा आएका उनी विश्वभाषा कलेजमा पनि पढ्ने गरेको खुलेको छ ।

विद्यार्थीको आवरणमा बसेर उनले बाल यौनदुराचारसम्बन्धी अपराध गर्दै आएको एसपी पाण्डेले बताए । जासनसँग पर्यटक र विद्यार्थी दुवै भिसा रहेको पाण्डे बताउँछन् । नेपालको कानुनअनुसार एकसाथ यसरी दुई भिसा लिन मिल्दैन ।

अमेरिका, भारतलगायत देशमा पनि उनीविरुद्ध मुद्दा चलिसकेको प्रहरीले जनाएको छ । अमेरिकामा उनले घरेलु हिंसासम्बन्धी मुद्दा खेपेका थिए । भारतमा यौनदुराचार मुद्दामा पक्राउ परेको प्रहरीले जनाएको छ ।

नेपालमा विभिन्न देशका यौनदुराचारी आउने गरेका छन् । गरिब देश भएकाले सहयोगको आवरणमा सजिलै बच्चासँग नजिकिन सकिने र समाजमा बाल यौनदुराचारबारे ज्ञान नभएकाले बाल यौनदुराचारीहरू नेपाल आउने गरेका छन् ।

खासगरी कमजोर आर्थिक अवस्था भएका परिवारका बालबालिकालाई उनीहरूले आफ्नो निशाना बनाउने गरेका छन् । समाजसेवीको आवरणमा यौनदुराचार अपराधमा संलग्न १० जना विदेशी हाल नेपालको जेलमा छन् । जसमा कतिपय उच्च पदमा पुगेका व्यक्तिसमेत छन् ।