युनिकोड
धनुषा निर्वाचन क्षेत्र ४ मा मतदातालाई पैसा बाँडेको आरोपमा एक उम्मेदवारलाई प्रहरीले पक्राउ गरेको छ।
मंगलबार राति धनुषाको क्षिरेश्वरनाथ नगरपालिका-४ चन्द्रपुरमा मतदातालाई पैसा बाँडेको आरोपमा निर्वाचन क्षेत्र नम्बर ४ का स्वतन्त्र उम्मेदवार स्थानीय राजकिशोर महरालाई धनुषा प्रहरीले पक्राउ गरेको हो।
राति करीब १२ बजे ४८ हजार ५ सय रुपैयाँ नगद र हिसाबकिताब गरिएको डायरीसहित उनलाई प्रहरीले नियन्त्रणमा लिएको जिल्ला प्रहरी कार्यालय धनुषाका एसपी रुगमबहादुर कुँवरले जानकारी दिए।
पैसा बाँडिरहेको सूचनाका आधारमा इलाका प्रहरी कार्यालय महेन्द्रनगरबाट खटिएको टोलीले महरालाई नियन्त्रणमा लिएको हो।
उनलाई थप कारबाहीका लागि जिल्ला निर्वाचन कार्यालय धनुषामा पठाइएको एसपी कुँवरले बताए।
स्थानीयका अनुसार नेकपा एमालेका उपमहासचिवसमेत रहेका धनुषा-४ का उम्मेदवार रघुवीर महासेठनिकट हुन्।
उनी महासेठकै डमी उम्मेदवार रहेको स्थानीयको दाबी छ।
यसअघि उनी महासेठकै चुनावी प्रचारप्रसार कार्यक्रममा पनि देखिएका थिए।
प्रतिक्रिया