रुपन्देहीमा ५ वटा अस्थायी मतदानस्थल कायम गरिएको छ। देशभरमै सबै भन्दा बढी अस्थायी मतदान स्थल रुपन्देहीमा तोकिएको हो।
रुपन्देही पछि काठमाडौंमा ४ वटा मात्र अस्थायी मतदान स्थल छन्। अन्य जिल्लाहरुमा एउटादेखि तीनवटासम्म अस्थायी मतदानस्थल राखिएको निर्वाचन कार्यालय रुपन्देहीले जनाएको छ।
रुपन्देहीमा बुटवलको रामनगर व्यारेक, सैनामैना नगरपालिकामा रहेको श्री नम्बर २ सैन्य तालिम गण सैनामैना र श्री सैनिक व्याटल स्कुल सालझण्डी, भैरहवामा रहेको जिल्ला कारागार र शसस्त्र प्रहरी बल नम्बर २७ गण हेडक्वाटरलाई पायक पर्ने गरि अस्थायी मतदानस्थल राखिएको छ।
रुपन्देहीमा ५ हजार ३०० अस्थायी मतदाता रहेको मुख्य निर्वाचन अधिकृत कृष्णराम कोइरालाले जानकारी दिए।
अस्थायी मतदाता नामावलीमा नाम समावेश भएका तर मतदान केन्द्रमा नखटिने कर्मचारी र सुरक्षाकर्मी, बृद्धाश्रममा रहेका व्यक्ति, निर्वाचन कशुरमा सजाय नपाएका कारागारका बन्दीले प्रतिनिधि सभाको समानुपातिकतर्फ मात्र मतदान गर्न पाउँछन्।
अस्थायी मतदानस्थल सहित रुपन्देहीभर कुल २१३ मतदानस्थल र ७०७ मतदान केन्द्र तोकिएको छ।
सबै मतदान केन्द्रका मतदान अधिकृतलाई मतपत्रसहित निर्वाचन सामग्रीहरु बुझाइएको छ। मतदान अधिकृतहरु बिहीबारै सुरक्षाकर्मीसहित मतदान केन्द्रमा पुग्ने छन्। शुक्रबार र शनिबार मतदान केन्द्र तयारीमा लाग्ने मुख्य निर्वाचन अधिकृत कोइरालाले बताए।
Shares
प्रतिक्रिया